Span Namibië rig visier op kompetisie

Span Namibië wys weer hul staal by vanjaar se Suid-Afrikaanse Kampioenskappe vir Uitvoerende Kunste (SACOPA).Die kompetisie wat tot Saterdag in die burgersentrum van Rustenburg in die Noordwes-provinsie in Suid-Afrika plaasvind, bied aan deelnemers die geleentheid om hul talent in verskeie kategorieë ten toon te stel.SACOPA bring deelnemers uit verskeie dissiplines byeen, insluitend dans, sang, instrumente, modelwerk en toneelspel.“SACOPA is veel meer as bloot nog ’n kompetisie. Dit is ’n veel groter Suid-Afrikaanse platform en dit bied aan ’n Namibiese deelnemer die geleentheid om hulself teen ’n groter veld van talent te meet,” sê die direkteur van die Namibiese kampioenskappe, Lomine Langley.Namibië se prestasie verlede jaar by die kompetisie was werklik indrukwekkend. Sewe deelnemers het deelgeneem en die uitslae spreek vanself: Goue- en silwermedaljes, sowel as algehele toekennings, is huis toe gebring, terwyl slegs twee deelnemers nie ’n plek behaal het nie. Dit was ’n kragtige herinnering dat Namibiese talent op hierdie groter verhoog tuishoort.“Span Namibië se teenwoordigheid by SACOPA dra gewig wat verder as individuele medaljes strek. “Dis ’n verklaring dat Namibiese deelnemers vir niemand hoef terug te staan nie. Deelnemers wat Namibië verteenwoordig, bewys jaar na jaar dat hulle net so bekwaam en talentvol as hul eweknieë van enige ander plek anderkant die grens is,” het Langley gesê.Vanjaar verteenwoordig Melissa Muller, Grace Lengoasa, Nirvanna-Liorah Sibolile en Ina Mai Namibië die kompetisie. Hulle sal aan sang- en dansitems deelneem, terwyl Muller ook aan ander items sal deelneem.Ten spyte van Namibië se talentpoel kan nie elke deelnemer wat kwalifiseer, dit bywoon nie; die redes hiervoor is prakties van aard en weerspieël nie hul vermoëns nie.“Die belangrikste rede is finansiering en die tweede rede is dat dit met ons Namibiese eksamentydperk saamval, so baie deelnemers kan nie eksamens misloop nie. “SACOPA duur ’n week in Suid-Afrika. Jy moet vir reis, kos en inskrywings betaal. Dit is regtig te duur vir die gemiddelde persoon om te gaan, en dit is so hartseer, want ons het soveel talentvolle deelnemers,” sê Langley.Dis ’n bittersoet werklikheid: Daar is geen tekort aan talent in Namibië nie, maar nie almal kry die geleentheid om op die SACOPA-verhoog te skitter nie.Terwyl vanjaar se deelnemers reeds hul land verteenwoordig, is die boodskap duidelik: “Namibië het niks om te bewys en niks om te vrees nie. Span Namibië is net so talentvol soos deelnemers van enige ander plek in die wêreld en as jy dit kan droom, kan jy dit doen,” sê Langley.– patricia@synergi.com.na

Span Namibië rig visier op kompetisie

Kommentaar

Republikein 2026-09-29

Meld asseblief aan om kommentaar te lewer

Span Namibië rig visier op kompetisie

Kommentaar

Republikein 2026-09-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.