Skilder op die see se voorstoep

Henriette Lamprecht -Sy is terug by haar passie - om te verf met jou voete wat wegsak in die sand wat korrel tussen jou tone, die branders se ritmiese in- en uitstoot jou musiek en die veranderende kleure van die see se grou tot groen hier voor jou as inspirasie. Ute Niebrügge is die stigter en hart agter Ocean Painters op Swakopmund en haar manier om hierdie vreugde en voorreg met ander te deel.“Ek glo kuns gaan nie oor perfeksie nie. Dit gaan oor vryheid, emosie en die eenvoudige skoonheid van die oomblik,” sê Ute.Wanneer sy skilder, luister sy na die branders, asem diep die lug in wat sout op jou tong proe en laat die kleure vloei.En deur Ocean Painters nooi Ute ander uit om dié magiese oomblike met haar te deel, vir ‘n wyle die geraas en die gejaag agter te laat en tot regtig tot stilstand te kom, diep asem te skep en jouself in kreatiewe oomblikke te vind wat vir altyd op ‘n skilderdoek vasgevang is. Vir baie jare het sy haar lewe en loopbaan gebou met kreatiwiteit, ontwerp en ‘n liefde vir natuurlike skoonheid as boustene, dryfveer en inspirasie. Ute se professionele reis begin as die kreatiewe brein agter die befaamde Nakara-matte, ‘n reeks van hoë kwaliteit, handgeweefde matte vervaardig uit natuurlike materiale. Sy verkoop die gesogte matte ver buite Namibiese grense en werk met kliënte oraloor die wêreld. “My werk het my toegelaat om iets betekenisvol te bou, “ sê Ute. Maar die meeste van alles, hoe kragtig outentieke vakmanskap kan wees. Nou bied Ute en Ocean Painters skilderklasse reg op die see se voorstoep aan waartydens jy met professionele instruksie en ondersteuning jou meesterstuk op die skilderdoek vasvang. Alles staan reeds vir jou reg wanneer jy aanmeld - van skilderdoek en akrielverf tot ‘n voorskoot, sê Ute. Die spesiale kunservaring van twee ure is geensins net vir professionele of ervare skilders of kunstenaars nie, beklemtoon sy. “Enigiemand kan deelneem!”Om met kleure te verf, beteken jy ervaar die see met al jou sintuie, sê Ute. Laag vir laag, kleur vir kleur, bring elke kwashaal vreugde, verduidelik sy. Twee groepklasse word daagliks in die oggend van 11:00 tot 13:00 en middae van 15:00 tot 17:00 by die Mole op die kusdorp aangebied. Dan is daar individuele klasse en klasse vir paartjies wat die perfekte geskenk vir ‘n huweliksherdenking is. Ook hier staan van gazebo tot stoele en tafels tot vonkelwyn reeds reg wanneer jy aanmeld. Natuurlik is daar ook ‘n foto van jou en jou kunswerk op die strand! Ute het ook ‘n konsep vir ‘n kreatiewe geleentheid vir maatskappye ontwikkel met ‘n blywende impak, gemik op ‘n spesifieke tema en die aantal deelnemers, vir dié wat hul personeel op ‘n kreatiewe manier wil inspireer.“Of dit ‘n konferensie, partytjie of spanbou is, om saam te skilder, verenig mense en skep blywende herinneringe,” sê Ute. Spanne het drie keuses wat insluit mosaïekwerk waartydens elkeen sy eie prent skilder en almal se kunswerk op die ou einde saam gesit word om een groot kunswerk te vorm. “Ons berei die formaat van die prente voor deur ‘n spesiale tegniek te gebruik sodat die individuele stukke op die ou einde perfek pas.” Die span se kunswerke kan individueel of as ‘n gesamentlike kunswerk aan die maatskappy voorgestel word.‘n Tweede opsie vir spanne is individuele kunswerke van die see in die formaat van hul keuse, terwyl die derde opsie ‘n grootformaat groepskildery is.“Dis perfek vir konferensies, seminare of vieringe. Elke gas spandeer sowat 15 minute om ‘n deel van die groep se prent te skep. Die motief kan individueel aangepas word tot die tema van die geleentheid,” verduidelik Ute. Die uiteinde is ‘n unieke kunswerk geskep deur die span wat en elke lid met mekaar verbind.Ocean Painters het ook geskenkbewyse veral in die lig van die fees- en Kersseisoen wat om die draai lê. “Of jy nou ‘n beginner of gevorderd is, ‘n verfklas bied inspirasie, ontspanning en natuurlik die kans om jou eie kunswerk te skep. Dit is die ideale geskenk vir enigiemand wat hul kreatiwiteit vrye teuels wil gee,” sê Ute. Sy beklemtoon Ocean Painters is verbind tot die bevordering van kreatiwiteit en om ’n diep waardering te kweek vir Swakopmund se unieke kuslyn en mariene omgewing. Om hierdie band tussen kreatiwiteit en die natuur reeds van ‘n jong ouderdom af te kweek, kom verf die kunsonderwyseres Tiensie Dry en haar kunsklas van Namib Primary op uitnodiging van Ocean Painters volgende Saterdag (22 November) vir van 11:00 tot 13:00 by die Mole op Swakopmund. “Die inisiatief het ten doel om jong leerders bekend te stel aan die vreugde om in die buitelug te skilder, omring deur die geluid van branders en ‘n vars seebriesie!” Lede van die publiek is welkom om te kom kyk hoe die jong kunstenaars hul kreatiwiteit in hierdie unieke kusomgewing ontdek.Vir meer inligting oor Ocean Painters, kontak vir Ute by 081 2911 632 of gaan loer op die webtuiste www.ocean-painters.com. - henriette@republikein.com.na

Skilder op die see se voorstoep

Kommentaar

Republikein 2026-01-13

Meld asseblief aan om kommentaar te lewer

Skilder op die see se voorstoep

Kommentaar

Republikein 2026-01-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.