Riaan Smit weer op die langpad

Riaan Smit, wat al vir minstens 20 jaar sy sangdroom uitleef en geliefd is vir sy blues-klanke, is besig om sy tasse te pak vir ‘n toer deur Suid-Afrika – waar hy meer as vyf verskillende bestemmings sal besoek en waartydens hy sy jongste enkelsnit “If You’re Lonely” bekend sal stel. Die toer skop op 7 Maart in Stellenbosch af en eindig op 20 Maart. “If You’re Lonely” word op 11 Maart uitgereik en Riaan hoop om soveel mense as moontlik te bereik met die liedjie se boodskap en gees. Hy glo ook dat hy, na twee jaar van inperkings en onsekerheid wat deur die Covid-19-pandemie meegebring is, weer ‘n risiko moet neem. “Ek het besluit dit is tyd om op te hou om die onbekende te vrees en my lewe terug te neem. Reis en toer was ‘n groot deel van my lewe en ek kan nie meer in vrees leef nie.”Hy sal na plekke soos Kaapstad, Mcgregor, Plettenbergbaai, Barrydale, Knysna, Port Elizabeth en St. Francisbaai reis. Hy sê dit is al die plekke wat hy al voorheen besoek het, met wonderlike gehore en pragtige siele.Die sanger wat homself nie tot ‘n genre wil beperk nie, maar die meeste met folk- en “gypsy”-musiek geassosieer word, sê die gehoor kan verwag dat hy sy alles op die verhoog sal gee. “Dis twee jaar sedert ek op toer was, en ek het baie om te sê en te sing,” sê hy en voeg by dat hy sy liedjies sowel as liedjies wat hy vir die band Crimson House geskryf het, gaan opvoer.Janelle Botha en Jessica Ashley, albei Swakopmunders, sal hom op die toer vergesel. “Hulle is ongelooflike sangers, en ek is verheug om hulle saam met my op hierdie toer te hê,” sê Smit.Ná dié toer beplan hy om terug te keer na Durban en Pretoria, asook om na Europa en die Verenigde State te reis as die wêreld weer oopgaan. “Ek is lief vir Namibië en wil bly, maar ek moet toer en reis, want dit is wat my inspireer om te skryf.”

Riaan Smit weer op die langpad

Kommentaar

Republikein 2025-05-13

Meld asseblief aan om kommentaar te lewer

Riaan Smit weer op die langpad

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie