Opera-eer vir Namibië se Janice

“In ’n sekere mate dink ek die feit dat ek swart is, het my teruggehou in opera, omdat dit vir ’n baie lang tyd elitisties was en deur wit mense gedomineer is, maar dit is nie meer so nie. Dit lyk goed vir ons,” het die Namibiese operasangeres Janice van Rooy gesê nadat sy as een van die finaliste vir die Elizabeth Greenfield-toekenning aangewys is. “Ek dink, ongeag of jy wit of swart is, moet jy net werk. In opera is die geleenthede min, so jy is óf roemryk óf jy het niks. Jy moet hard werk sodat mense van jou sal kennis neem,” het sy gesê. Die Elizabeth Greenfield-toekenning is gemik op jong, swart operasangers en poog om hulle in die oorgang van hul studies na die begin van hul loopbaan te bemagtig. Van Rooy het onlangs die rol van Matjiua vertolk in die eerste Namibiese opera, Eslon Hindundu se Chief Hijangua, tydens sy debuut in Duitsland.Verskeie operaresensente het lof vir Van Rooy se debuut gehad. Opera Today se Andrew Moravcsik het haar as ’n charismatiese jong sangeres bestempel en gesê: “Sy het vreesloos die verhoog haar eie gemaak met ’n ferm en resonante stem en baie houding – albei tekens van potensiaal as ’n toekomstige operadiva.”Die Duitse televisienuusdiens Tagesschau het weer gesê sy het “met ’n ongelooflike kragtige sopraanstem bo die hele ensemble uitgestraal.”Janice sê sy het glad nie die benoeming of die gawe woorde van resensente verwag nie. “Ek kon nie glo mense wat kritiek lewer oor operas sou voel dit wat ek doen is van ’n hoë gehalte nie. Ek is so nederig en dankbaar daarvoor,” het sy gesê. Sy vertel die span agter hierdie produksie moes dit binne ’n kort tyd aanmekaarsit. “Gewoonlik oefen jy ’n maand lank vir ’n opera nog voor jy jou voete op die verhoog sit. Ons moes Chief Hijangua van begin tot einde in twee en ’n half weke doen. Ek was vreeslik op my senuwees,” het sy gesê. Janice vertel in die nabye toekoms wil sy steeds op haar studies fokus. “Ek voltooi in Junie volgende jaar my graad, dan wil ek graag my meesters doen aangesien ek steeds ’n ten volle betaalde beurs het vir twee jaar,” sê sy.- irene@republikein.com.na

Opera-eer vir Namibië se Janice

Kommentaar

Republikein 2026-09-18

Meld asseblief aan om kommentaar te lewer

Opera-eer vir Namibië se Janice

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.