’n Soel Sondag saam met Anna

Byna drie dekades gelede skop ’n liedjie uit haar eie pen met huishoudelike geweld as die tema, haar musikale reis as een van Suid-Afrika se mees ikoniese Afrikaanse sangers af. Anna Davel wen in 1997 die ATKV-Crescendo-kompetisie met haar inskrywing “Viooltjies” wat haar stewig as sangeres, liedjieskrywer en kunstenaar vestig. Die volgende jaar behaal Anna haar diploma in ligte musiek/jazz aan die Tshwane-universiteit van Tegnologie en sluit later dieselfde jaar by die gewilde a cappella-vrouegroep, Cutt Glas, aan. Tot 2003 is sy lid van die groep wat deur Suid-Afrika toer en ook in die buiteland in lande soos die Verenigde Koninkryk (VK), Portugal, Finland, China en België. Gedurende haar tyd by die groep stel Cutt Glas drie albums vry. In 2003 besluit Anna om ’n sololoopbaan te volg en sedertdien gaan haar loopbaan van krag tot krag met verskeie hoogs aangeskrewe albums en ’n skatkis van oorspronklike musiek uit haar pen. In 2006 is haar debuut-solo-album met die gesogte SAMA (Suid-Afrikaanse Musiektoekenning) vir Beste Kontemporêre Album vir Volwassenes (Afrikaans) bekroon. In 2008 is Anna saam met slegs vyf ander vooraanstaande Suid-Afrikaanse vroue vir die toekenning as Beste Vrouesanger tydens die gesogte VMT-musiektoekenningsgeleentheid by Emperor’s Palace genomineer.Anna se liedjies word beskryf as ’n “foto van ’n oomblik, ’n venster op iemand se lewe of ’n ‘snapshot’ van daardie altyd-ontwykende ervaring”. Daar is “Kompas” oor hoe die hart sy eie pad volg te midde van ons pogings tot orde, “Photograph” se besef dat iemand wat jy verloor het se geliefde gelaatstrekke besig is om uit jou geheue te vervaag en Sondagmiddag se skoonheid van vervlietende oomblikke soos een Herfsmiddag in Mei saam met ’n spesiale vriend. Anna en haar meesleurende melodieë en soel stem is as deel van die FNB Windhoek Woordfees se Sondae in September-program hierdie Sondag om 18:30 in Droombos se tuin te hoor. Kaartjies is by webticket.com beskikbaar. – henriette@republikein.com.na

’n Soel Sondag saam met Anna

Kommentaar

Republikein 2026-09-18

Meld asseblief aan om kommentaar te lewer

’n Soel Sondag saam met Anna

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.