'n Fees van films

Die Namibiese Filmkommissie se Filmweek by die Namibië Universiteit van Wetenskap en Tegnologie (Nust) loop Sondag ten einde. Dit beteken nog twee dae om te kies en te keur uit plaaslike en buitelandse films om jou naweek af te sluit.

Meer as 159 films was deel van die vyfde Filmweek, met 67 plaaslik vervaardigde films wat vertoon is. 

Ook deel van die week se program is verskeie slypskole, paneelbesprekings en meesterklasse aangebied wat daarop gemik is om die voortgesette groei van die Namibiese rolprentbedryf te bevorder.

Die Filmweek skep ’n ruimte vir filmmakers, studente en gehore om kragtige storievertelling te ervaar, terwyl dit ook bespreking aanwakker oor die toekoms van die bedryf in Namibië en oraloor die vasteland. 

Die rolprente word vandag en môre van 10:00 tot 21:30 vertoon. Gehore het ook die kans om vir hul gunsteling- Namibiese film te stem vir die toekenning vir Gehoorgunsteling by die Namibiese Teater- en Filmtoekennings.