Moederliefde die vonk vir avontuurboeke

Toe die ma van ’n jong Namibiese seun agterkom dat hy sukkel om ’n liefde vir lees te ontwikkel, het sy besluit om ’n storie te skryf wat om sy eie lewe draai. 

Dié idee het ’n klein vonkie laat ontstaan wat onverwags tot ’n bekroonde kinderboekreeks ontwikkel het.

Verlede jaar, toe Junior van der Merwe in graad 2 was, was hy soos vele ander agtjariges: vol nuuskierigheid, verwondering en opgewondenheid om die buitewêreld te verken, maar huiwerig om rustig met ’n boek te gaan sit.

Sy ma, Surika van der Merwe, het alles in haar vermoë gedoen om hom aan te moedig om te lees. Hoewel hul huis vol kinderboeke was, het Junior altyd verkies om bloot deur die prente te blaai eerder as om in die teks te duik.

Een aand, ontmoedig deur die voortdurende stryd om Junior aan die lees te kry, het haar man, Schalk, ’n eenvoudige dog briljante oplossing voorgestel: Waarom nie ’n storie skryf waarin Junior self die hoofkarakter is nie?

As enigste kind is Junior selde gesien sonder sy troue metgesel – ’n stewige mopshond (pug) met ’n groot persoonlikheid genaamd Bertus. Oral waar Junior sou gaan, het Bertus kort op sy hakke gevolg.

Dit was ’n natuurlike keuse om Bertus by die verhaal te betrek. Die dinamika van hierdie werklike duo het na die bladsye oorgespoel: Junior, met sy kenmerkende rooi hare, bril met ’n veiligheidsbandjie en kaal voete, langs Bertus – ’n lieflike “goue seun” van ’n hond met ’n tong wat net ’n bietjie te groot vir sy bek is.

SLAAPTYDSTORIE WORD TREFFER

Dié persoonlike benadering het gewerk. Junior was mal daaroor om oor sy eie avonture saam met Bertus te lees.

Toe sy ma sien hoeveel opgewondenheid die stories vir hom bring, het sy die stories aan die begin van die volgende skooljaar met sy graad 3-onderwyser gedeel. Die onderwyser het dit hardop vir die klas gelees, waar die ander kinders dit met entoesiasme ontvang het.

Aangemoedig deur hierdie reaksie, het Surika die drie stories vir die Namibiese ATKV-toekennings ingeskryf, waar Junior en Bertus se Avontuur uiteindelik ’n Pluimpie gewen het.

Dié erkenning het bevestig dat hierdie gesinsverhale vir slaaptyd potensiaal vir ’n breër gehoor gehad het.

Die kerndoelwit van die reeks was om jong Namibiese kinders te voorsien van stories waarmee hulle kan identifiseer en wat in hul eie omgewing afspeel. In plaas daarvan om net oor verre plekke te lees, kan kinders karakters volg wat bekende omgewings verken – soos om aan sportbyeenkomste in Gobabis deel te neem, of op die platteland groot te word.

“Ek wil hê kinders, groot en klein, moet die vreugde van stories en lees ervaar. Vir jong kinders behoort hierdie boek ’n oomblik saam met ma of pa te wees waar hulle ’n lekker storie kan lees en tyd saam kan deurbring.

“Wanneer hulle die storie lees, wil ek hê hulle moet vir ’n oomblik van alles daar buite vergeet en ’n opwindende, gelukkige oomblik saam beleef,” sê Surika.

Om jong lesers te ondersteun wat die oorgang maak van stories wat deur hul ouers voorgelees word na selfstandige lees, word die boeke in ’n groot lettertipe gedruk.

Toe die eerste gedrukte eksemplare arriveer, was dit ’n emosionele mylpaal vir die gesin. Junior was in sy skik om homself en Bertus in ’n regte boek te sien; hy het die nuus gretig met sy skoolmaats gedeel en die bladsye sommer dadelik vir Bertus gewys.

“Ek het soveel emosies ervaar. Ek kon nie glo dat ek drie kinderboeke gelyktydig kon publiseer nie, en dat dit oor my eie seuntjie en sy hond gehandel het.

“Ek het nie geweet of ek moet lag of huil, of liewer in die kas moet gaan wegkruip nie. Ek het ’n mengsel van emosies ervaar, maar gelukkig was my man aan my sy om te keer dat ek wegvlug,” het die skrywer gesê.

Surika voeg by dat Junior geweldig trots op die boeke en op sy ma was, en dat hy geweet het die boeke gaan oor hom en Bertus, al het sy nie gedink hy besef reeds ten volle dat hy ’n “storieboekheld” is nie.

WAT Lê VOOR?

Die skrywer Surika van der Merwe het aangedui dat ’n nuwe boek in wording is. Hoewel sy nie te veel oor hierdie nuwe avontuur verklap nie, het sy genoem dat jong lesers en die breër kinderboekgemeenskap die boek vroeg in 2027 kan verwag.

KRY DIE BOEKE HIER

Die Junior en Bertus-reeks is plaaslik oraloor Namibië beskikbaar by The Book Den, Uncle Spikes en Future Manager Books in Windhoek, asook Die Muschel Boekwinkel op Swakopmund.

Die eerste boek in die reeks is ook as ’n e-boek op Amazon beskikbaar – met verdere titels wat sal volg – of kan direk per e-pos by [email protected] bestel word.

– [email protected]