Martha se omgee-stories

Die saadjie vir haar liefde vir lees en skryf is geplant die dag toe sy vir die eerste keer ‘n Huisgenoot in die hand gedruk is om vir haar ouma voor te lees. Vandag is die 49-jarige Martha Sibila /Khoeses reeds die afgelope agt jaar voltyds skrywer, deeltyds ‘n dosent in Engels en afrigter in kreatiewe skryfkuns. Na haar eerste bekendstelling aan die Huisgenoot, het sy begin om al die tydskrifte te verslind waarop sy haar hande kon lê, vertel Martha. Sy het ‘n gereelde besoeker aan die nasionale biblioteek in Windhoek geword en boeke oor ‘n breë spectrum begin lees. Op die brose ouderdom van 14 lees sy oor die ontvangers van die gesogte Pulitzer-toekenings en maak ‘n belofte aan haarself dat ook sy plaaslike stories gaan skryf vir die wêreld om te lees.Martha, wat self haar boeke publiseer, se jongste pennevrug is I Care en spruit uit haar tyd in Skotland in 2022 toe sy in haar soeke na werks- en studiegeleentheid as versorger in die land gewerk het. As iemand wat deur ‘n verpleegster grootgemaak en tydens haar grootwordjare aan die gesondheidsbedryf blootgestel is, haar diens aan beide die Kankervereniging van Namibië (CAN) en later die Sentrum vir Siektebeheer gekoppel aan die ministerie van gesondheid en maatskaplike dienste, het haar gemaklik en ervare in die mediese bedryf en in veral versorgingsdienste gemaak.In die tyd wat Namibië as nuwe land haar voete begin vind het, het Martha besef dat versorgingsdienste soos ons dit in die Afrikakonteks sien, baie verskil van die gestruktureerde dienste in die Westerse wêreld.“Terwyl ek myself vertroud gemaak het met die nuwe vereistes vir versorging, my voete in ‘n vreemde ruimte moes vind en terselftertyd al die grappe gelees het van Namibiërs op sosiale media oor die ervarings van die in diaspora wat hul ‘blouboordjie’werk gelos het vir iets meer ‘gering’ soos versorging, het ek gevoel ek moet reageer,” vertel Martha.In die eerste konsep van die boek het sy net uitgevaar teen alles en almal, erken sy, om te probeer ontslae raak van al die frustrasie oor al die uitdagings en ellende waarmee sy aan die ander kant van die wêreld te doen gekry het.“Jy ontdek sekere dinge en ek wou baie daarvan ontbloot.”Soos die konsep egter gevorder het, het Martha haar egter verdiep in haar werk as versorger en wonderlike mense ontmoet wat gemaak het dat sy haar ervaring deur ‘n ander lens sien. Na ‘n paar maande het die eerste konsep van die boek verander en het sy inligting begin versamel uit ‘n oogpunt van vriendskappe wat gevorm is, spesiale oomblikke en werklike uitdagings vir beide die kwesbare kliënt, die versorger en die familie.Ook die menslike aspek wanneer vreemdelinge ontmoet en mekaar en vrede vind in ‘n ruimte van liefde en versorging. “Die boek het totaal verander en ek wou die positiewe uitlig wanneer ons mekaar by die siekbed van ‘n geliefde of aan die einde van iemand se lewe ontmoet.”Martha wou ook hulde bring aan al die dierbare vriende wat sy ontmoet en later gesterf het. “Die mense wat ‘n diens en helpende hand van my nodig gehad het, het uiteindelik my skuilings geword, my geleer, gelei en gewys wat onvoorwaardelike liefde in ‘n vreemde ruimte is.”Die sentrale tema van I Care is deernis, liefde en sorg vir mekaar, want al kom ons van verskillende agtergronde, is ons menslike behoeftes steeds dieselfde, sê Martha. Die name en sommige voorvalle is kreatief verander om haar kliënte se identiteit te beskerm, maar die stories in die boek is huidige en werklike uitdagings wat in die versorgingsbedryf ervaar word. “Dit is my, my kollegas en dierbare kliënte se stories maar ook die van ander versorgers in diaspora.”Weens beserings wat sy by haar werk opgedoen het, moes Martha met uitgebreide verlof gaan en het later bedank. Sy het die boek in drie maande voltooi, terwyl sy met haar eie gesondheid gesukkel het en het haar ruimte vir haar persoonlike genesing geword. Wanneer sy ‘n idee vir ‘n boek of projek kry, “eet, slaap en leef” sy die hele proses, erken Martha. As iemand wat self publiseer, is daar finansiële implikasies want jy betaal vir die redigering, grafiese ontwerp, druk en bemarking, daarom die besluit om nie reeds verlede jaar haar boek bekend te stel nie. As mentor vir aspirant-skrywers wou sy ook nie dit bekendstel in dieselfde tyd as een van haar leerlinge nie, omdat die lesersgemeenskap en die land so klein is. “Jy wil nie dieselfde groep mense op dieselfde tyd teiken en die mark oorversadig maak nie, daarom die besluit om eers vanjaar I Care vry te stel.”Dit is aanlyn as ‘n e-boek deur Amazon en Payhip vir die internasionale mark en in April vanjaar as ‘n sagtebandweergawe in Namibië vrygestel. Om ‘n verspreider in Namibië te vind, is ‘n uitdagende proses, erken Martha wat reeds sedert 2018 boeke op Amazon direk aan haar lesersgehoor versprei. Vanjaar het Book Den dadelik die jawoord gegee om as verspreider vir I Care op te tree, met van haar ouer boeke wat ook eersdaags hier beskikbaar sal wees. Vir enige navrae oor haar boeke, kan Martha gekontak word by khoeses@gmail.com. – henriette@republikein.com.na

Martha se omgee-stories

Kommentaar

Republikein 2025-10-16

Meld asseblief aan om kommentaar te lewer

Martha se omgee-stories

Kommentaar

Republikein 2025-10-16

Meld asseblief aan om kommentaar te lewer

MELD AAN

Advertensie