Kuns vir Kuba

Namibiese kunstenaars het die leiding in solidariteit met inwoners van Kuba geneem om van hul kunswerke te skenk om geld vir dié land in te samel. 

Volgens Marcii Magson, stigter en artistieke direkteur van die Bellhaus Atelier & Galerie in Windhoek, het kunstenaars hul hande opgesteek toe “meer as 50 besighede, banke en maatskappye” nie wou help nie. 

“Kunstenaars weet wat dit beteken om te sukkel,” sê Magson en hoewel die meeste Namibiese kunstenaars geen begroting het om aan finansiële ondersteuning vir die inwoners van Kuba te bestee nie, het hulle, volgens haar, die werk van “hul hande en hul harte” geskenk. 

Tans het 26 Namibiese kunstenaars reeds 68 kunswerke beskikbaar gestel om verkoop te word, met nog meer wat teen gister se sperdatum verwag is. 

Vir Danie Botha van die Namibië-Kuba Solidariteit Fondsinsamelingskomitee is die antwoord op die vraag waarom dit juis Kuba is – en wat die land presies so spesiaal maak – eenvoudig.

“Toe Namibië onder apartheid gely het en Amerika die apartheidsregering van Suid-Afrika ondersteun het, het Kubane opgestaan en ons mense gehoor wat vir hul menswaardigheid gepleit het. 

“Hierdie land het na ons uitgereik, opofferings vir ons gemaak en vir ons opgestaan,” het Botha gesê.

Hy het Namibiërs daaraan herinner dat ’n “vriend in nood inderdaad ’n vriend is”.

“Ons vriend verkeer nou in nood,” het hy beklemtoon. 

Efraim Gwai Jane, wat die Nanso-veteranevereniging op die komitee verteenwoordig, het gesê die geldinsameling is ’n nie-partydige, humanitêre inisiatief wat op “mense-tot-mense-vlak” plaasvind en op die Namibiese samelewing as geheel gemik is.

“Ons praat met Namibiërs om hulle daaraan te herinner dat ons vryheid in ’n groot mate te danke is aan die groot opofferings wat deur die mense van Kuba gemaak is. Ons het ’n groot skuld van dankbaarheid teenoor Kuba,” het Jane gesê.

“Kuba het nie gekom en gesê hulle kry swaar of gevra dat ons hulle moet help nie. Namibiërs het egter voordeel getrek uit internasionale solidariteit en ons beskou dit as ons morele verpligting om Kuba in hul tyd van nood by te staan. 

“Elke sent wat ingesamel word, gaan in die amptelike rekening en daar is reeds twee mediakonferensies gehou waar verantwoording gedoen is oor hoe die geld aangewend word.”

Volgens Jane is dit eerstens bedoel vir mediese voorrade en om te help met die daaglikse stryd tussen lewe en dood waarmee inwoners te kampe het en tweedens vir sonkragstelsels, aangesien Kuba onder geweldige druk weens die olieblokkade verkeer. 

In agtergrondinligting wat vir die Amerikaanse dinkskrum Council on Foreign Relations opgestel is, verduidelik Surina Venkat en Diana Roy die verhouding tussen die Verenigde State van Amerika (VSA) en Kuba word sedert 1959 deur wantroue en vyandigheid gekenmerk en dat die VSA sedertdien sanksies teen Kuba handhaaf – langer as teen enige ander land.

Die Amerikaanse president Donald Trump se tweede termyn – wat gevolg het op die ontvoering van die Venezolaanse president Nicolás Maduro, ’n bondgenoot van Kuba – het streng beperkings op olie-invoere na dié eilandnasie meegebring.

“Elke sent tel. Geen skenking is te klein nie. Ek doen ’n beroep op alle Namibiërs om asseblief by te dra. Kom ons staan ​​saam en ondersteun die mense van Kuba,” het Jane gesê.

“Ek glo dat kuns die verloop van die geskiedenis sal verander,” het Magson gesê.

“Wanneer geld swyg, spreek kuns steeds. Hierdie is nie bloot ’n galery wat kuns verkoop nie. Dit is ’n nasie wat op ’n vriend in nood reageer.”

Die uitstalling open Maandag om 18:00, met werk aan die muurskildery “Art for Cuba” wat Woensdag begin op een van Bellhaus se buitemure, “sodat die straat self ons verhaal kan vertel,” het sy gesê.

Donderdagaand word ’n sesgangmaaltyd met ’n Kubaanse aanslag – aangebied deur sjef Siobhan Dammert as deel van die “Art Supper Club” teen N$1 450 per kaartjie – voorgesit. Die geleentheid sluit optredes deur die sangeres Trish en die digter Keith (Black) Vries in.

Kunswerke deur Namibiese kunstenaars onder wie Alfeus Mvula, Erick Schnack, Kaleb Haipinge, Jo Rogge, Liboleus Nekundi en Ndako Nghipandulwa, is tot Vrydag 30 Oktober te koop. 

Onder die werke is ses oorspronklike skeppings deur Ndasuunje Papa Shikongeni, wat gesê het: “Dit is niks nuuts dat kuns deel vorm van die stryd om solidariteit nie.”

Art for Cuba maak deel uit van ’n breër veldtog deur die Namibië Kuba Vriendskapvereniging (NAMCUFA) en die Sam Nujoma-stigting.

– [email protected]