Koormusiek gee Lüderitz-jeug ’n stem

Koormusiek bring gemeenskappe bymekaar, versterk jongmense en bied ondersteuning in moeilike tye. 

Só sê die stigter en dirigent van die Lüderitz-jeugkoor, Mario Uiseb (36).

“Om koormusiek te maak is nie maklik nie. Dit is egter iets mooi, omdat dit in eenheid en in eenstemmigheid gedoen word,” het Uiseb, ’n chemikus by die Lüderitz-staatshospitaal, gesê. 

“Musiek en sy boodskap dra baie mense deur die swaarkry van die lewe.” 

Volgens Uiseb is koormusiek ’n belangrike deel van Namibiese gemeenskappe, veral in kerke. “Die meerderheid Namibiërs is Christene wat kerkdienste bywoon en dit is waar jy koormusiek beleef.”

Uiseb glo koormusiek is weer besig om in Namibië gewild te word ná ’n tydperk van agteruitgang. 

“Koormusiek leef en gaan goed in die land. Belangstelling het teen ’n ontstellende tempo gedaal, maar het in die afgelope jare weer begin styg, deels danksy die insette van die Nasionale Teater van Namibië. Deesdae sien ons baie aktiewe kore regoor die land.” 

Uiseb, gebore op Grootfontein, het die Maria Bron St Isidore Laerskool bygewoon, waar sy passie vir musiek begin vorm aanneem het.

Hy skryf dit aan sy ma, Eva Uises, toe wat sy belangstelling in koormusiek van vroeg af gekoester het. 

“Ek het nie toegang gehad tot musiekskole of topkore soos die meeste dirigente nie. Ek het toegang gehad tot my ma se musiek. 

“My ma is my mentor. Sy het my geleer om die skoonheid te waardeer van alles waaruit die musiek bestaan waarna ek geluister het. Ek het steeds goeie herinneringe daaraan, en ons praat gereeld oor koormusiek.”

Toe Uiseb na Lüderitz verhuis het, het hy gevind dat die hawedorp nie ’n aktiewe jeugkoor het nie. Hy het besluit om dit te verander deur die Lüderitz-jeugkoor te stig. Sedertdien het die koor aan verskeie kompetisies en geleenthede deelgeneem, onder meer die Old Mutual-koorkompetisie en twee keer aan die Blended Voices-koorkompetisie.

Uiseb het ook derde plek behaal met die Angra Pequena Senior Sekondêre Skoolkoor by die nasionale liedjiekompetisie van die Teenkorrupsiekommissie van Namibië (ACC) se groot eindstryd in September 2023 en N$7 500 gewen.

DIRIGENT

Vir Uiseb gaan dirigeer oor baie meer as om voor ’n koor te staan en sangers te lei.

“Dit is nie maklik om ’n koordirigent te wees nie. Jy het geduld en leierskap-eienskappe nodig, want dit gaan daaroor om mense te lei.

“Jy weerspieël letterlik ’n koor. Dit is ’n ongelooflike reis. Musiek is mooi en kragtig en jy staan aan die voorfront daarvan.”

Uiseb sê sy dirigeerstyl is steeds besig om te ontwikkel. Kompetisies bied geleenthede om terugvoer van beoordelaars en ervare dirigente te kry, terwyl blootstelling aan ander kore hom ook gehelp het om te groei. 

“Ek ontwikkel nog as dirigent. Ek leer met tyd,” het hy gesê.

Sy benadering is gefokus op kommunikasie en verbinding met die koor, terwyl hy ook gehore betrokke hou, ongeag die genre wat uitgevoer word.

Om sangers met verskillende vlakke van ervaring te bestuur kan uitdagend wees, maar Uiseb glo ervare lede kan jonger sangers help ontwikkel.

“Jy identifiseer sterk karakters in jou koor en gebruik hulle om ander lede te help vorm.” 

Hy glo ’n balans tussen ervare en jonger sangers is belangrik. 

“Volwasse sangers help die jonges om met tyd te ontwikkel en te groei. Dit is ook belangrik om talent te identifiseer en sangers te motiveer.”

DISSIPLINE

Dissipline, sê hy, is ewe belangrik. 

“Soos in elke aspek van die lewe, is dissipline die kern daarvan dat ’n groep op maksimum kapasiteit funksioneer en sukses behaal. 

“Wanneer jy verskillende mense uit verskillende agtergronde bymekaar bring, is die eerste ding wat jy moet vestig dissipline. 

“Dit begin by selfdissipline. Elke koorlid moet verstaan dat hulle hulself en ander moet respekteer om as ’n groep te groei.” 

Hy glo musiek kan ook help om dissipline te ontwikkel en te versterk.

Een van die grootste uitdagings waarmee die koor te kampe het, is die beskikbaarheid van sy lede.

“Ander verpligtinge beïnvloed die opkoms van my koorlede en sonder hulle kan die vertoning nie aangaan nie.” 

Hy het gesê om tyd vir kooroefeninge te vind, is ’n groot uitdaging, terwyl die afstand tussen Lüderitz en ander dele van die land ook die koor se blootstelling aan nasionale geleenthede en ander kore beperk.

Ten spyte van hierdie uitdagings het dirigeer ’n beduidende invloed op Uiseb persoonlik gehad. “Dit het my gehelp om situasies anders te hanteer as wat ek waarskynlik sou toe ek jonger was.” 

Hy erken ook die verantwoordelikheid wat daarmee saamgaan om jongmense te lei. 

“Ek is ’n openbare figuur vanweë die koor wat ek dirigeer en ek lei ’n groep jongmense, so ek moet ’n positiewe voorbeeld stel.”

Uiseb hoop sy werk met jongmense sal ’n blywende uitwerking hê.

Hy wil jongmense positief beïnvloed en seker maak dat die werk wat hy gedoen het, veral in Lüderitz, voortgaan nadat hy uiteindelik van koormusiek af aanbeweeg.

Sy eie musikale ambisies bly hoog. Uiseb se droom is om die Stellenbosch Universiteitkoor vir een uitvoering te dirigeer. 

“Hulle sing pragtig, het baie hoë standaarde gestel en bly die pad op die koormusiekfront aanwys,” het hy gesê. 

“Natuurlik vind die harde werk altyd agter die skerms plaas.”

– [email protected]