Bones wil Weekend Band herenig

Solomon Goodhart, beter bekend as Bones, het sy Namibiese musiekloopbaan in 1976 begin toe hy van Suid-Afrika in Walvisbaai aangekom het. Nou, 67 jaar oud, het Bones in April verlede jaar ’n hartaanval gehad wat hom vir drie weke in die hospitaal laat beland het. Nou beplan hy om sy ikoniese musiekgroep, die Weekend Band, te herenig. Vanjaar sou die groep se 48ste bestaansjaar wees. Die oorspronklike lede is almal in hul 60’s en baie woon in die buurland Suid-Afrika.“Maar dit sou lekker wees om Namibië weer as die Weekend Band te kan vermaak,” sê dié veteraan-hoofsanger.“Ons is nou al 48 jaar saam en kan bou na ’n goue 50ste herdenking. Ek sou dit graag wou doen,” sê Bones.Destyds, voordat hy sy trouvrou langs die Namibiese kus ontmoet het, was die eerste groep wat hy in Namibië gevorm het Hot Ones, wat sowat ’n jaar musiek gemaak het.Hy het tot bekering gekom, maar later weer teruggeval, onthou die pa van nege kinders. Op ’n dag stap hy verby die Desert Inn-hotel en hoor die klanke van ’n groep wat liedjies oefen.“Ek het ingeloop en binne ’n japtrap ’n song saam met hulle gedoen.”Dit was in 1981 en kort daarna was hy die jongste lid van die Weekend Band saam met John (Blare) Camm, Benny (Business) Maseko, Daniel (Dial) Gouws, Timothy van der Hewer en Raymond (Beatle) Locke.Die groep het tot 1986 bestaan voordat Blare, Beatle en Dial die Weekend Band verlaat het, vertel Bones. Hy het egter gou saam met Business en Toney Andries die nuwe lede Betrim Cloete, Bruce Newman, Rodney Mitchel en Benny Maart verwelkom om die groep te laat herleef. “Ons het oraloor Namibië gespeel en by die Suidwes Hotel beland waar ons vir drie jaar gebly en by Club Peacock opgetree het. Ons was baie gewild in Rehoboth,” onthou hy.“Die eerste liedjie wat ek opgeneem het, was saam met Maseku, ‘Cheesa,’ en toe ‘The Wonderland’ wat ek self geskryf het. In 1990 het ek die groep verlaat en na Suid-Afrika teruggekeer waar ek vir twee en ’n half jaar in Durban saam met Upfront en ook saam met Frontline in die Kaap opgetree het.“Toe is ek weer terug Namibië toe om weer saam met Bruce, Rodney en Tony Andries op die klawerbord die Weekend Band te laat herleef. Benny Maseko het egter agtergebly,” vertel Bones.Daar was groot sukses, erken hy, hulle het ’n “lavish lifestyle” geniet, met vier motors wat in die oprit by ’n groot huis in Windhoek se Rocky Crest, en ook by Klub Weekend en Kings gestaan het waar die groep gereeld opgetree het. Aantygings van diefstal deur ’n aanhanger van die groep by ’n baie groot geleentheid het egter die publiek se vertroue in Weekend Band erg geskaad en die werksgeleenthede het opgedroog, vertel Bones. Hy het agterstallig met betalings geraak en toe ook siek geword.Tans is Bones en Benny Maart steeds amptelik lede van die Weekend Band, alhoewel Bones meer as ’n jaar laas gespeel het. Hy bly wel steeds besig om sy derde album te voltooi.Tula Tula in 2007 het goed gevaar, maar vir die tweede versameling, Main Attraction, kon hy slegs 50 laat maak. Met sy jongste poging Mr. Bones and Friends, wil hy tien plaaslike kunstenaars soos Eliaser (Oompie) Abel Kavari en Whani Jansen betrek, vertel Bones.Vorige treffers soos “Jy Maak Jou Laat” met Whani, het die Weekend Band se mengsel van jazz en langarm onder Namibiese gehore gewild gemaak. Die Rockets het ook plaaslik sukses met “Na my bokkie toe” gehad, wat Bones oorspronklik geskryf het en waarvoor hulle hom vir die regte gevra het.“Ek soek borge om in dieselfde asem vir ‘Mr. Bones and Friends’ klaar te maak en vry te stel. Ons kry swaar en ek is deur ’n rowwe tyd. Ek weet nie of die mense van ons vergeet het nie,” sê hy.Volgens Bones het die musiekbedryf in Namibië die afgelope jare baie verbeter en die hele nasie is nou betrokke by musiek maak, waar dit voorheen beperk was. “Dit is ’n goeie ding. Hulle doen ’n goeie job,” sê hy. “Ek het veral baie van Ras Sheehama se musiek gelike,” voeg hy by. Bones sien veral daarna uit om die nuwe liedjie wat hy vir Whani geskryf het, “Regte Pad”, met die medesanger te deel, aangesien Whani dit nog nooit vantevore gehoor het nie, sê hy. – augetto@nmh-hub.com.na

Bones wil Weekend Band herenig

Kommentaar

Republikein 2026-04-29

Meld asseblief aan om kommentaar te lewer

Bones wil Weekend Band herenig

Kommentaar

Republikein 2026-04-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.