Blik op Gawanas se lewensreis

Nuusredaksie – Die Namibiese filmmaker en kreatiewe regisseur, Othilia Tutu Mungoba, se eksperimentele dokumentêr wat die lewe, nalatenskap en persoonlike reis van een van Namibië se prominente leiers ondersoek, skop af met The Encapsulation of Bience Gawanas.

Die film, wat as ’n eksperimentele besinnende biografiese portret beskryf word, beweeg weg van ’n konvensionele chronologiese biografie. In plaas daarvan gebruik Mungoba argiefmateriaal, persoonlike artefakte, foto’s en prentmateriaal om ’n intieme oudiovisuele portret van Gawanas weer te gee. 

Volgens die filmmaker poog die dokumentêr om verder as Gawanas as ’n openbare figuur te kyk en haar ervarings, waardes, uitdagings, oortuigings en bydrae tot die Namibiese samelewing te verken.

Die film poog ook om ’n belangrike hoofstuk van Namibië se maatskaplike en politieke geskiedenis te bewaar, terwyl dit aan gehore ’n meer persoonlike perspektief op Gawanas se reis bied. Dit word aangebied as deel van bedrywighede wat op Heldedag en Vrouemaand fokus. 

Die openbare vertoning vind op 28 Augustus om 18:30 by die Thüringer Hof Hotel in Windhoek plaas. Gawanas sal na die vertoning aan ’n vraag-en-antwoordsessie deelneem, wat gehore die geleentheid gee om met haar te gesels oor haar lewenservarings, leierskapsreis en die nalatenskap wat sy hoop om agter te laat. – [email protected]