Bekroonde Erentia se kortfilms op tuisbodem

Haar speelgrond was Damaraland se "torraklippe" en mopaniebome en die Namib se oop vlaktes. Waar jy jou drome op die horison kan sien sit en wag, sê die bekroonde stop-raam-animasiekunstenaar en kortfilmregisseur, Erentia Bedeker, wat tans in haar hartland kuier en om haar unieke wonderwêreld ook met Namibiërs te deel. Erentia se komvandaan begin op Khorixas waar haar ouers steeds bly, draai by haar skooljare op Otjiwarongo, toe dramastudent op Stellenbosch tot in Johannesburg waar sy en haar lewensmaat saam ’n animasie- en grafiese ontwerpstudio, Wreckless Creative, in 2018 begin het. Haar eerste groot projek en narratiewe kortfilm, Ruby &amp; Roach, het by 77 filmfeeste wêreldwyd vertoon en is met 18 pryse bekroon; ’n film wat Erentia Saterdag tydens ’n spesiale vertoning in Windhoek gaan vertoon want, sê sy “ek voel die film behoort nou op my tuisgrond ook te wys!”.Haar films is almal 100% handgemaak, vertel Erentia, en sy gebruik minimale rekenaartegnologie in haar films. “In post-produksie trek ons hier en daar iets reg gedurende die redigeringsfase, maar dit wat jy op die skerm sien, is alles met die hand gemaak en raam vir raam afgeneem en aanmekaargesit – 24 rame (of dan foto’s) per sekonde,” sê sy.Met stop-raam-animasie word ’n fisiese objek of tekening met klein inkremente beweeg en elke beweging word afgeneem, verduidelik Erentia. Elke sekonde van beweging op die skerm bevat ten minste 24 foto’s. Wanneer die foto’s aaneen gespeel word, skep dit die illusie van beweging. “Dit was basies die beginpunt van animasie voor rekenaars nog uitgedink is. Hoe vinniger jou beweging is wat jy wil animeer, hoe groter is die inkremente tussen elke foto; hoe stadiger die beweging hoe kleiner die inkremente waarteen jy die objek beweeg.” “Een tree wat ’n karakter oor die skerm gee, word dus opgedeel in sê maar 12 inkremente vir ’n rustige stappie. Vir elke sekonde gee die karakter dan twee tree.”Buiten vir Ruby &amp; Roach word The Stonemason, die eerste film wat onder Wreckless se vaandel geskryf en vervaardig is, en ’n derde “spesiale film” Saterdag deur Erentia om 11:00 by Fowler House in Newtonstraat in Windhoek vertoon. Toegang is gratis. (Lees meer môre in Kollig en die fokusartikel in Republikein se aanlyn uitgawe Saterdag) – henriette@republikein.com.na

Bekroonde Erentia se kortfilms op tuisbodem

Kommentaar

Republikein 2026-10-29

Meld asseblief aan om kommentaar te lewer

Bekroonde Erentia se kortfilms op tuisbodem

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.