ATKV vier Afrikaanse uitnemendheid

Die room van Namibiese Afrikaanse skryfwerk en kreatiwiteit is onlangs tydens die 29ste ATKV-toekennings in Windhoek vereer, waar digters, skrywers, dramaturge en joernaliste erkenning ontvang het vir hul bydrae tot die groei en behoud van Afrikaans.Die jaarlikse toekennings, aangebied deur die ATKV Windhoek, bekroon uitnemendheid in verskeie kategorieë, met toekennings wat wissel van sertifikate, Donsies, Pluimpies, Veertjies, Afrikoon en uitsonderlike toekennings.Vanjaar het verskeie skrywers hul merk gemaak. In die Veertjie-kategorie is Marietjie Espach vereer vir haar digbundel Oomblik in tyd, terwyl Marcha Vorster die hoogste erkenning ontvang het vir haar bundel Woordspatsels. By die prosawerke is Marlene Erasmus bekroon vir haar kortverhaalbundel Ons laaste asem, Jimi, linkerhandlegende en Vlerke, Surika van der Merwe vir As is verbrande hout, Ruan Verrall vir Padkos vir die Pelgrim, en Irene Nel vir die kinderverhaal Zani-beer en klein Maggie kuier op die plaas.Die ATKV-toekennings het ook sterk erkenning aan opkomende en gevestigde skrywers gegee. Marsofine Krynauw, Marcha Vorster, Marlene Erasmus, Mia Nolte en Magda Swartz is vir hul digkuns vereer, terwyl Selma Slabbert, Marsofine Krynauw, Irene Nel, Surika van der Merwe en Marlene Erasmus onderskeidings vir prosa- en kinderverhale ontvang het.In die Donsie-afdeling het onder meer Ryno du Plessis, Koster Cronje, Mogamat Salie Saban, Stefanus Gous, Jackie Mans, Katusha Persendt, Otto Klotz, Selma Slabbert, Frederik Engelbrecht, Isabella Adamson en Surika van der Merwe erkenning vir hul digkuns, lirieke en prosawerk ontvang.Sertifikate is aan Jackie Mans vir die drama Die man waarmee EK getroud is en Lynelle van Wyk vir Afrikaans Leef toegeken.Benewens die literêre toekennings is verskeie spesiale eerbewyse ook oorhandig. Die Afrikaans 101-toekenning het erkenning gegee aan individue en instellings wat oor dekades 'n betekenisvolle bydrae tot Afrikaans gelewer het. Onder die ontvangers was Keetmanshoop Privaatskool (30 jaar), Privaatskool Moria (35 jaar), Excelsior Privaatskool (35 jaar), Hendrik en Leoni van Rensburg, Charlie en Ansa Ellis, Chantelle van den Berg, Anita Naude, asook ATKV Idiomestryd-wenners van 2025, Liza en Elizma Booysen. Sportjoernalis Andrew Poolman is vir sy 30 jaar by Republikein vereer, terwyl Elvira Hattingh erkenning ontvang het vir haar bydrae tot Afrikaanse landboujoernalistiek by Republikein, Agri Monitor en AgriForum.AFRIKOONDie gesogte Afrikoon-toekenning is vanjaar aan Yolanda Nel toegeken vir haar twee dekades lange loopbaan in joernalistiek. Die toekenning word deur ’n lid van die publiek genomineer. Yolanda het reeds op 18-jarige ouderdom haar eerste voorbladberig gepubliseer en het sedertdien 'n gevestigde naam in Namibiese media geword. Haar loopbaan het haar van toerisme- en hofberiggewing na gemeenskapsjoernalistiek geneem, waar sy bekend geword het vir stories met betekenisvolle maatskaplike impak. Ná haar jare by Republikein en Kanaal 7 staan sy vandag aan die stuur van die digitale tydskrif Impact en beskik sy oor 'n meestersgraad in kommunikasie en joernalistiek.Die glansryke aand is afgesluit met drie uitsonderlike toekennings. Marcha Vorster het die Oswald Rall Theart-toekenning vir haar digbundel Woordspatsels ontvang, Surika van der Merwe is met die Herman van Wyk-toekenning bekroon vir haar kortverhaal As is verbrande hout en Irene Nel het die met die Andree J. Tötemeyer-toekenning vir haar kinderverhaal Zani-beer en klein Maggie kuier op die plaas weggestap.“Ons streef na ’n groot 30 jaar 2027,” het ATKV-bestuurslid, Leoni van Rensburg, aan Republikein gesê wat ook volgende jaar 50 jaar oud word.– annemarie@capetalktv.co.za

ATKV vier Afrikaanse uitnemendheid

Kommentaar

Republikein 2026-09-14

Meld asseblief aan om kommentaar te lewer

ATKV vier Afrikaanse uitnemendheid

Kommentaar

Republikein 2026-09-14

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.