Van Kasteel tot boetiekhotel?

Die Nasionale Erfenisraad van Namibië (NHC) het ’n aansoek ontvang om een van Windhoek se mees herkenbare en historiese geboue in ’n boetiekhotel te omskep. 

Die aansoek is vir die herontwikkeling van die hoofstad se alombekende Kasteel ontvang, wat op erf 7270 in Schwerinsbergstraat geleë is. 

Die Kasteel het beduidende erfeniswaarde en word geklassifiseer as Graad A99 – een van die hoogste erfenisgraderings – wat die geskiedkundige en argitektoniese belangrikheid daarvan weerspieël.

Dit vorm ook deel van ’n groter erfeniskompleks wat dateer uit die laat 1800’s.

Volgens geskiedkundige rekords is die perseel se vroegste struktuur, ’n kliptoring, in 1890 deur die Duitse keiserlike kommissaris Curt von François gebou. Argitek Wilhelm Sander het die gebou later in ’n gewilde biertuin, bekend as Sperlingslust, omskep.

Die struktuur is ’n noemenswaardige voorbeeld van laat 19de-eeuse Europese Romantiese ontwerp, met kenmerke soos torings, dekoratiewe vensters en klipmesselwerk.

Die huidige aansoek stel voor dat die oorspronklike toring gerestoureer word, terwyl ’n klein boetiekhotel op die oostelike deel van die eiendom ontwikkel word.

Die Kasteel het na bewering vir ongeveer 25 jaar leeggestaan, met die beplande restourasie wat daarop gemik is om die toestand en historiese karakter daarvan te bewaar.

Die voornemende ontwikkelaars het aangedui dat die projek die gebou se bestaande voorkoms sal behou, insluitend die vorm, kleure en sleutelontwerpelemente.

Die bykomende strukture is bedoel om die terrein aan te vul sonder om Windhoek se horison te beïnvloed of die uitsig op die historiese toring te belemmer.

Planne vir die ontwikkeling is weeksdae tydens kantoorure vir openbare besigtiging by die eiendom in Schwerinsbergstraat en ook by Erf 153 in Eerw. Michael Scottstraat by NHC se kantoor beskikbaar.

Lede van die publiek en ander rolspelers het 14 dae om skriftelike kommentaar of besware in te dien ná die publikasie van die kennisgewing.

– [email protected]