Polisiebehuising by grensposte onder die loep

Cheetah Cement het 10 ton sement aan die ministerie van binnelandse sake, immigrasie, veiligheid en sekuriteit oorhanding, as deel van hul korporatiewe maatskaplike verantwoordelikheid.

Die adjunkminister, Dr. Daniel Kashikola, het by die oorhandiging by die Cheetah Cement plant in Otjiwarongo gesê dat hierdie sement aangewend sal word tot die verbetering van die woonkwartiere vir polisiebeamptes wat by grensposte gestasioneer is.

"Hierdie bydrae van Cheetah Cement kom op 'n tyd wanneer die Namibiese Polisiemag uitdagings rakende die verskaffing van behoorlike akkomodasie vir sy lede in die gesig staar. Sommige lede, veral dié wat by grensposte ontplooi is, leef in betreurenswaardige omstandighede aangesien hulle in vervalle tente akkomodeer word," het Kashikola gesê.