Is jy die gesig van Namibië?

’n Aanlyn fotokompetisie wat daarna streef om jongmense te wys hulle word gesien en dat hulle ’n stem het. Dis die kruks van die Face of Namibia-kompetisie wat gemik is op Namibiërs tussen ses en 30 jaar oud, waartydens 12 jongmense gekies sal word met ’n outentieke skoonheid en ’n persoonlike storie wat Namibiërs inspireer. Volgens die organiseerder, Anita Senekal, vind die fotokompetisie ten volle aanlyn plaas en is dit oop vir alle Namibiërs tussen die ouderdomme van ses en 30 jaar. “Dit is nie ’n regstreekse geleentheid, gala of openbare optrede nie. Daar is geen kleedrepetisies, verhoogtyd, reis of dragkodes betrokke nie,” het Anita verduidelik wat ook die stigter en die organiseerder van Miss HOPE Namibia National is en meer as 31 jaar ondervinding in die wêreld van skoonheidskompetisies het. Dit beteken Face of Namibia 2025 meng geensins in met skoolskedules, eksamens, sport of enige ander belangrike verpligtinge nie.“Dit is ontwerp om eenvoudig en veilig en net aanlyn te wees,” het Anita beklemtoon. Deelnemers verskaf net ’n foto van hulself wat op die Miss HOPE Namibia National se Facebookblad geplaas word. Die beoordeling word onafhanklik en onder meer deur ’n professionele paneel in Suid-Afrika gedoen. Die wenners word via WhatsApp en sosiale media voor die einde van Augustus aangekondig. Volgens Anita sal die 12 wenners wat aangewys word, uitgenooi word om aan die Miss HOPE Namibia National 2026-kompetisie deel te neem waar hulle leiding sal ontvang om ’n persoonlike of skoolgebaseerde liefdadigheidsprojek voor te lê.“Finaliste van daardie geleentheid kan moontlik gekies word om Namibië by die Hope International-geleentheid in 2026 in Suid-Afrika te verteenwoordig.”Volgens Anita is die fokus van die kompetisie om hoop en sigbaarheid te gee aan diegene wat andersins nie die geleentheid sou kry nie. “Ons kan vir jongmense wys dat hulle saak maak, dat hulle gesien word en dat hulle ’n stem het.”Anita se hart klop warm vir Namibië se jongmense en het haar lewe daaraan toegewy om hulle te bemagtig. Sy staan in dié verband aan die stuur van verskeie gemeenskapsprojekte en skep platforms wat die hart van die land weerspieël. Sy is ook die stigter en organiseerder van Miss HOPE Namibia National, wat nie ’n “tradisionele skoonheidskompetisie” is nie. “Ons is ’n beweging van hoop, een wat waarde heg aan natuurlike skoonheid, empatie en verandering gelei deur die jeug. Ons doel is om op te hef, te inspireer en ’n stem aan jong Namibiërs met ’n doel en ’n hart te gee!” Volg dié skakel https://form.jotform.com/251344513137046 vir ’n inskrywingsvorm vir Face of Namibia of skakel Anita by 081 225 5019 vir verdere besonderhede. Inskrywings sluit op 31 Julie 2025 om 10:00.– henriette@republikein.com.na

Is jy die gesig van Namibië?

Kommentaar

Birgit Skutsch 4 Dae Gelede 11 June 2025

Meld asseblief aan om kommentaar te lewer

Is jy die gesig van Namibië?

Kommentaar

Birgit Skutsch 4 Dae Gelede 11 June 2025

Meld asseblief aan om kommentaar te lewer

MELD AAN

Advertensie