Duisende kilometer op ’n fiets vir renosters

Die Suid-Afrikaanse kampvegter vir wildbewaring, Wayne Bolton, het verlede Sondag sy bergfietsrit van 2 400 kilometer vanaf Swakopmund na Gqeberha (Port Elizabeth) in Suid-Afrika begin as deel van die Forever Rhino Ride Expedition. Teen die einde van verlede week het hy in Sossusvlei aangekom waar hy vir drie dae sal rus voordat hy sy reis verder na die NamibRand-natuurreservaat sal aanpak. Hy het gesê die vier dae van fietsry was hoofsaaklik op grondpad – 280 km van die totale 410 km – en hy mos ’n aantal struikelblokke, soos onder meer ’n aanhoudende en sterk wind van voor, die talle bulte waar hy selfs afdraand moes trap, sinkplaat en sanderig paaie, die woestynhitte en tonne stof trotseer.“Dis duidelik die toerismebedryf is weer op dreef met talle safarivoertuie wat verby my gery het,” het hy gesê. Volgens hom sal die ekspedisie bewustheid skep van die behoefte vir gewone mense, oor verskeie lande en kulture heen, om die oeroue renosterspesies te bewaar.“Renosters was dalk nog altyd by ons, maar ons kan dit nie meer as vanselfsprekend aanvaar nie,” het Bolton gesê. Hy het verduidelik die rede vir die verbintenis tussen Namibië en Suid-Afrika is omdat Namibië die grootste bevolking van die kritiek bedreigde swartrenosters het en Suid-Afrika van die bedreigde witrenosters. Gevolglik sal ’n simboliese skakel tussen die antieke Namibwoestyn in Namibië en die Karoo-gebied in Suid-Afrika gevorm word.“Dié twee lande is verbind as primêre bewaarders van ons planeet se oorblywende renosters,” het hy gesê.“Dit is ondenkbaar dat ons met vandag se kennis en tegnologie die uitwissing van ’n spesie waag wat sedert die begin op die aarde is.”Die reis skop by die Atlantiese Oseaan af en sal by die Indiese Oseaan op Wêreldrenosterdag op 22 September eindig.Simbolies val dit ook in die toerisme- en erfenismaand, ’n belangrike maand vir die herstellende toerismebedryf. Bolton is glo die enigste persoon wat al 19 Suid-Afrikaanse nasionale parke simbolies met ’n bergfiets verbind het.Hierdie reis van 6 000 km deur Suid-Afrika oor 80 dae met ’n gemiddelde 100 km per dag, sou nie net ’n avontuur wees nie, maar ’n reis van selfontdekking en visie.Sy strewe en passie om ’n verskil vir die “stemlose renoster” te maak, het gelei tot die stigting van One Land Love It – ’n niewinsgewende organisasie met ’n groeiende voetspoor in renosterbewaring. – republikein@republikein.com.na

Duisende kilometer op ’n fiets vir renosters

Kommentaar

Republikein 2025-11-05

Meld asseblief aan om kommentaar te lewer

Duisende kilometer op ’n fiets vir renosters

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.