ATKV-Applous maak ’n draai in Windhoek

Die Namibiese streekfees van die ATKV-Applous-skoolkoorkompetisie vind môre en Saterdag in Windhoek plaas, waar 15 skoolkore om ’n plek in die nasionale finaal sal meeding.

Die ATKV-Applous-kompetisie is die oudste skoolkoorkompetisie in Suid-Afrika en het vanjaar altesaam 314 inskrywings ontvang. 

Streekfeeste is gedurende Mei en Junie by 19 venues in Suid-Afrika en Namibië gehou om die top-40-kore vir die finale ronde te kies. Die Windhoek-fees is die laaste op die kalender. Die ATKV-afvaardiging wat die geleentheid bywoon, sluit Johan Esterhuisen, bestuurder van jeugprojekte by die ATKV in , asook die beoordelaars Bessie Keun en Rieke van Aswegen.

Die kompetisie begin môre in die NG Kerk Eros met die junior kore (laerskole) om 13:30, gevolg deur die senior kore (laerskole) om 16:00. Die hoërskoolkore tree Saterdag vanaf 11:00 op. Kaartjies kos N$50 en sal by die deur beskikbaar wees.

Die kore wat na vanjaar se ATKV-Applous-finaal deurdring, sal ná afloop van al die streekfeeste aangekondig word. Die finaal vind van 29 Julie tot 1 Augustus in Kaapstad se stadsaal plaas.

– [email protected]