Die Boekrak

In Soetdorings in die ruigtes deur Christiaan Bakkes keer Caleb Kelly, ’n jong Eerste Wêreldoorlog-veteraan, in 1916 getraumatiseerd en geskend terug na die Oos-Kaap. Die gruwels wat hy in Frankryk beleef het, is in sy wese ingeprent. Kort ná sy terugkeer vernietig olifante die windpomp op sy plaas. Caleb is woedend en gereed om wraak te neem. Maar dan gebeur iets onverwags en sy woede maak plek vir ’n vriendskap met ’n trop wat bedags tussen die ruigtes naby die plaas skuil.

Intussen word grootskaalse landbou-ontwikkeling in die Sondagsriviervallei deur die regering van stapel gestuur. Dewald Troskie word aangestel om die olifante in die omgewing uit te dun. Deur geskiedkundige feite met fiksie te verweef, neem die skrywer lesers op ’n reis vanaf 1919 tot die stigting van die Addo-olifantpark in 1931.

Soetdoring in die ruigtes is meer as ’n historiese roman – dis ’n meditasie oor trauma en genesing, oor die mensdom se vermoë tot beide vernietiging en verlossing. 

Die onbreekbare band tussen Caleb en sy trop olifante sal lesers ontroer, uitdaag en inspireer.