Dans deur die lewe

Wat as ’n spontane idee begin het, het vinnig ontwikkel tot ’n nuwe swingdans-beweging in Windhoek. 

Kat Stahl, wat haar liefde vir die swing in die Verenigde State van Amerika ontdek het, bring nou dié dansstyl na die hoofstad en sy bou ’n gemeenskap van dansers van alle ouderdomme en vermoëns.

Stahl het in 2006 vir die eerste keer die swing in Grand Rapids probeer en was onmiddellik betower deur die energie, die musiek met die groot orkes en die gevoel van samehorigheid.

“Die swing is vryer as baldans. Dit gaan oor om lewendig te voel, met die musiek te verbind en die oomblik te geniet,” sê sy. 

Hoewel sy nie van die begin af natuurlik goed daarin was nie, het sy aangehou om te oefen en uiteindelik selfs begin lesse aanbied.

Toe sy na Windhoek verhuis het, het sy lank gewag om ’n plaaslike swingdans-gemeenskap te begin. Vroeër vanjaar het sy egter haar eerste swingdans-werkwinkel aangebied – 28 mense het dit bygewoon –van hoërskoolleerlinge tot werkende volwassenes, van ervare dansers tot algehele beginners.

Delta-kleuterskool het ’n geskikte ruimte gebied om die groep te huisves en kort daarna is die eerste swingdans-bal by Steam Punk Lounge gehou.

Die klaservaring is toeganklik en ontspanne. Geen ervaring of dansmaat is nodig nie, aangesien die deelnemers tydens die les dansmaats ruil.

Stahl wys daarop dat die grootste wanopvatting is dat mense ritme nodig het om te begin: “Enigeen kan leer.” 

Sy fokus veral op East Coast Swing, ’n toeganklike en ritmiese styl wat beginners vinnig selfvertroue gee.

Vir Stahl gaan die swing oor meer as net die danspassies. 

“Dit laat mense toe om te speel, te lag en met mekaar te verbind. Ek sien selfs selfvertroue groei en vriendskappe vorm.”

Sy vertel hoe baie van haar studente, selfs dié wat aanvanklik gesê het hulle het twee linkervoete, verbasend vinnig binne net ’n paar lesse leer dans.

Swingdans-klasse vind weekliks op Donderdae van 18:00 tot 19:00 plaas, vir groter groepe en kleiner private sessies. Belangstellendes kan by die groep via WhatsApp by +49 1763 462 7043 aansluit. 

Vir Stahl kan die swing opgesom word as “die vreugde van die lewe”.

Sy beplan om jaarliks van Januarie tot Mei die klasse in Namibië aan te bied en hoop om die gemeenskap jaarliks verder te laat groei.

– [email protected]