10 jaar van The Movie Guy

Ek kan nie glo dis al ’n dekade sedert ek hiermee begin het nie, en wanneer ek terugkyk, is ek verbaas oor wat ek al kon bereik het. 

The Movie Guy het nie net as een idee begin nie, maar eerder as ’n versameling van dinge wat op ’n wonderlike manier saamgeval het. In April 2016 is my eerste werklike filmresensie gepubliseer en as ek reg onthou, was dit vir Batman v. Superman: Dawn of Justice.

Ek het in Maart 2016 by Windhoek Express begin, en aangesien dit ’n gemeenskapskoerant was, wou ek iets hê wat net myne sou wees. Ek het sport, skolenuus en vermaak probeer, maar niks het regtig uitgestaan nie.

Ek het toe besef dat die meeste koerante nie ’n afdeling vir filmresensies het nie.

Ek het my eerste resensie vroeg in April ingedien, en dis waar alles regtig begin het. Ek was en is steeds mal oor films en ek kon my mening oor allerhande films gee. 

As ek nie na die rolprentteater kon gaan nie, het ek op ’n TV-reeks gefokus. Ek dink dit was middel 2018 dat ek besluit het om ’n “blog” te begin, afsonderlik van my gewone resensies.

Ek wou steeds hê dit moes op films fokus, maar nie net resensies nie. Ek wou filmranglysies doen en my mening oor verskillende popkultuur-gebeurtenisse gee. Ek het nog nie ’n naam gehad nie, maar dit was maklik om een te kry. Ek is ’n man wat van films hou, so ek het besluit om myself The Movie Guy te noem.

Die Instagramblad het baie later gekom. Dit was in Julie 2019 toe ek my eerste videoresensie op YouTube gelaai het en dit was vir Spider-Man: Far From Home. Dit is steeds op die kanaal. Ek het wel ná drie of vier video’s moed opgegee.

Dit was ook in 2019 dat ek Comic Con Africa vir die eerste keer bygewoon het. Toe het 2020 gekom, en alles het tot stilstand gekom. My droom om die volgende groot filmresensent te wees, het doodgeloop.

Ek het nog vir ’n rukkie resensies geskryf, maar uiteindelik kon ek nie meer na die flieks gaan nie.

In Mei 2022 het ek TikTok-video’s begin kyk en ek het besluit om weer self video’s te publiseer. Ek het my eerste TikTok opgelaai waarin ek oor Doctor Strange in the Multiverse of Madness gesels het. Ek het weer begin resensies skryf en dit lyk asof mense dit gelees het.

Ek het weer na Comic Con Africa gegaan en in daardie stadium het ek geweet ek moet aanhou om The Movie Guy te wees. Dit het alles dalk 10 jaar gelede begin, maar in 2022 het ek myself daartoe verbind. Daar was oomblikke toe ek wou opgee.

Ek het breekpunte, slapelose nagte, honderde afwysings en aanlyn boelie-aanvalle ervaar, maar ek sou dit steeds vir niks verruil nie.

Soos ek dit sien, is dit maar nou net die begin. Ek het nou onderhoude met akteurs gevoer, verskeie filmgeleenthede bygewoon, vriende in die bedryf gemaak en ek doen uiteindelik iets wat ek regtig liefhet. Ek het my blog www.themovieguy.co.za herbekendgestel, sodat almal my vordering kan volg.

The Movie Guy is nie meer net ’n ou wat van films hou nie. Dis ’n handelsmerk wat die liefde vir films, TV en popkultuur lank nadat ek nie meer hier is nie, sal bly deel.

– t[email protected]