Jeug kry nóg hulp om besighede te begin

Die Nasionale Jeugontwikkelingsfonds brei verder uit, met die goedkeuring van byna N$15 miljoen in lenings vir jeuggeleide besighede teen verlede Vrydag.

In ’n mediaverklaring van die ministerie van finansies, het die woordvoerder, Wilson Shikoto, verduidelik dat verlede week se goedkeurings die derde in ’n reeks projekte is wat gefinansier is sedert die fonds in September 2025 van stapel gestuur is.

Shikoto sê dat die Ontwikkelingsbank van Namibië (DBN) einde verlede jaar reeds 30 besighede geïdentifiseer en goedgekeur het vir finansiering ter waarde van N$8,6 miljoen.

Een van die begunstigdes is die 27-jarige Naboth De Celestino, wat sy lening van N$200 000 sal gebruik om sy regsfirma teen April of Mei te vestig. Drie poste sal deur De Celestino & Co Legal Practitioners in Kavango-Wes geskep word.

Die 30 goedkeurings sluit ander besighede in, soos die Riverdale Private Academy, waar onderrigaktiwiteite tien nuwe poste sal skep met die lening ter waarde van N$1 miljoen.

O&M Accountants and Auditors kry ’n lening van N$717 000 om ook tien werksgeleenthede te skep. Kleiner begunstigdes sluit in Moses Media House, wat twee werksgeleenthede in Kavango-Oos sal skep met ’n lening van N$250 000, asook The Printing House in Otjozondjupa, wat ook twee werksgeleenthede sal skep met ’n lening van N$103 000. 

Die kleinste goedgekeurde lening was N$60 000, wat Franco en Beny Trading in Otjozondjupa se konstruksiebedryf drie nuwe werksgeleenthede sal skep. Besighede in die konstruksiebedryf, toerisme, mode en skoonheidsmiddels, landbouverwerking, media, onderwys, drukwerk, begrafnisdienste en ook ’n bakkery is onder meer goedgekeur. Altesaam moet 137 nuwe werksgeleenthede deur die finansiering geskep word.

Voorheen is goedkeurings ter waarde van N$5,3 miljoen aan 16 jeuggeleide besighede toegeken. In totaal is 46 besighede deur die DBN goedgekeur vir finansiering, wat altesaam N$14,9 miljoen beloop, het die woordvoerder gesê.

“DBN is tans besig om uitbetalings vir verskeie goedgekeurde besighede te finaliseer. Terselfdertyd beoordeel die bank ongeveer 40 bykomende aansoeke met verdere uitbetalings wat teen die einde van Februarie 2026 verwag word,” volgens Shikoto.

Die ministerie van finansies het egter versuim om te reageer op spesifieke vrae wat twee weke gelede gestuur is rakende die uitbetaling van tesouriefondse aan die verspreidingsvennote; naamlik DBN, Agribank en die Omgewingsbeleggingsfonds (EIF) van Namibië.

Network Media Hub (NMH) wou weet hoeveel geld die nasionale tesourie tot dusver uitbetaal het vir die finansiering van projekte vir die Nasionale Jeugontwikkelingsfonds. Daar is ook gevra hoeveel die DBN, Agribank en die EIF elk reeds ontvang het en hoeveel hierdie finansiële instellings tot dusver versprei het. Onder meer is ook gevra of daar enige terugbetalings was vir die lenings wat reeds deur die Jeugontwikkelingsfonds uitbetaal is.

Die kantoor van die uitvoerende direkteur kan eers ná die finalisering van die nasionale begroting antwoorde op hierdie vrae verskaf, sê Shikoto.

Die jongste verklaring bevestig wel dat die geleentheid om aansoek te doen steeds beskikbaar is, met goedkeuring wat dienooreenkomstig voortduur. Aansoeke kan by die kantore van die streekgoewerneurs, of by DBN, Agribank en die EIF ingedien word.

– [email protected]