Erongo-jeugfonds betaal N$17 miljoen uit

Tot dusver het 47 begunstigdes in die Erongostreek N$17 miljoen uit die Nasionale Jeugontwikkelingsfonds (NYDF) deur middel van die Development Bank of Namibia (DBN) ontvang, sê goewerneur Nathalia /Goagoses.Een aansoeker het egter aan president Netumbo Nandi-Ndaitwah gesê die kantoor wat hul aansoeke hanteer, het slegs twee personeellede. /Goagoses het die syfers tydens haar verwelkoming verlede Vrydag by ’n openbare vergadering in Mondesa, Swakopmund, gedeel. Volgens haar hoop die streek om ten minste N$50 miljoen uit die nasionale fonds te verkry.“Die fondse is steeds beskikbaar, die geleenthede is steeds daar,” het sy gesê. Aansoekvorms kan by die goewerneur se kantoor verkry word.Volgens Nandi-Ndaitwah het die regering geluister toe jongmense oor die oorspronklike ouderdomsperk van 35 gekla het.“Ons het dit verstaan en die perk verhoog sodat ons meer mense kan bereik,” het sy gesê.Die president het spesifiek na ’n vulstasie in Dâures en ’n jong dokter se praktyk in Erongo verwys wat as projekte deur die gefinansier is.’n Aansoeker vir ’n landbouprojek het gesê hulle was onder die eerstes wat aansoek gedoen het toe die fonds van stapel gestuur is, maar is steeds in die derde stadium van die terugvoerproses.“Mens kan seker sê dit sal duur totdat Michael Jackson terugkom,” het die aansoeker tydens die openbare vergadering gesê. “Vir ons is gesê meer as 1 000 tot 2 000 aansoeke is ontvang. En daar is net twee mense in die kantoor.”Nandi-Ndaitwah het erken nie alle aansoekers het terugvoer ontvang nie.“Ek vra egter die verantwoordelikes om dringend ’n stelsel in plek te stel wat ten minste ’n bevestiging van ontvangs kan stuur, of selfs kan aandui waar die tekortkominge in ’n projek lê,” het sy gesê.Nog ’n inwoner het gevra hoe inligting oor opleidingsgeleenthede in die petroleumsektor diegene kan bereik wat dit nodig het.Kornelia Shilunga, hoof van die Upstream-petroleumeenheid in die kantoor van die president, het verduidelik advertensies vir PetroFund-beurse word nou deur die kantore van goewerneurs en streekrade versprei en is ook aanlyn beskikbaar.Aansoeke vir meestersgrade in olie- en gasbestuur, sowel as in energie-ekonomie en -reg, het op 30 Oktober gesluit. Aansoeke vir petroleum- en ander ingenieursrigtings, inligting- en kommuniekasietegnologie en robotika het op 6 November gesluit. ’n Meestersgraad in vervaardigingsingenieurswese, wat spesialisaseer in sweiswerk, wat in samewerking met die Universiteit van Namibië (Unam) aangebied word, sluit op 16 November.Shilunga het erken die goewerneur se kantoor het die aansoeke nie ontvang nie. “Miskien moet ons verseker dat sodra ons die aansoeke na die goewerneur se kantore stuur, ons opvolgwerk doen – deur te bel en vas te stel of dit wel ontvang is,” het sy gesê.Die fonds is in September verlede jaar deur eerste minister Elijah Ngurare op Gobabis van stapel gestuur. Republikein het vroeër berig die eerste N$14,8 miljoen is toegeken aan projekte wat na verwagting 315 werksgeleenthede sou skep. Ngurare het die instellings wat die fonds bestuur, aangemoedig om eerder deure vir jongmense oop te maak, as om struikelblokke in hul pad te plaas.Die fonds was aanvanklik tot persone tussen die ouderdomme van 18 en 35 beperk, maar die ouderdomsbeperking is later na 45 verhoog. Volgens die ministerie van finansies het die fonds landswyd sowat 13 809 aansoeke ontvang, terwyl lenings ter waarde van N$135 miljoen goedgekeur en N$90,8 miljoen reeds uitbetaal is. – adam@erongo.com.na

Erongo-jeugfonds betaal N$17 miljoen uit

Kommentaar

Republikein 2026-11-10

Meld asseblief aan om kommentaar te lewer

Erongo-jeugfonds betaal N$17 miljoen uit

Kommentaar

Republikein 2026-11-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.