Erastus se gholfdroom word waar

Dit is nie net die storie van ’n jong seun wat ’n droom ontdek het wat hy nie geweet het hy het nie, maar ook wat moontlik is wanneer gemeenskappe saamspan om inklusiwiteit en bemagtiging deur middel van sport te ondersteun. Dis die storie van ’n 16-jarige seun wie se lewenspad nie altyd sonder struikelblokke is nie, wat op ’n dag vir die eerste keer ’n gholfstok vashou en die passie vir die spel van toe af in hom brand. Erastus Sheehema is met skoliose en brachiale pleksus-verlamming gediagnoseer en hoewel hy mobiel en aktief bly, ervaar hy beperkings, veral aan die linkerkant van sy liggaam. Hy is tans by Side by Side Early Intervention Centre se voor-beroepsgerigte program ingeskryf. Hoewel sy self beperkte kennis van gholf het, was dit duidelik dat dit meer as net ’n verbygaande belangstelling vir hom is, vertel Michelle Zeelie, die mediese en gemeenskaps- maatskaplike werker by Side-by-Side. Die sentrum ondersteun kinders wat met gestremdhede saamleef, hul ouers, versorgers, familie en hul gemeenskap.“Dit was ’n nuutgevonde passie, een wat die potensiaal het om vertroue te bou, om inklusiwiteit te bevorder en hom vreugde te bring,” sê Michelle. Die baie spesiale ontmoeting tussen Erastus en ’n gholfstok -en bal was op 28 Maart vanjaar tydens die Hit for Hope-geldinsameling waar hulle die eerste keer sou kennis maak. Sedertdien vra hy daagliks wanneer hy weer kan gaan gholf speel, vertel Michelle. Erastus se droom is nou ’n stap nader aan ’n werklikheid met die Namibië Junior Gholffederasie wat deur Pieter Fox ’n junior golfstel vir hom gaan borg en wat volgende maand aan hom oorhandig sal word. Boonop kry hy ook ’n gholfinstrukteur van die federasie wat opgelei is om mense met verskillende gestremdhede touwys in die fynere kunsies van gholf te maak. Erastus se storie het die potensiaal om soveel ander te inspireer, sê Michelle. Diegene met of sonder gestremdhede moet geïnspireer word om geleenthede in gholf en ook verder te verken. – henriette@republikein.com.na

Erastus se gholfdroom word waar

Kommentaar

Republikein 2025-11-04

Meld asseblief aan om kommentaar te lewer

Erastus se gholfdroom word waar

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.