Beurse vir die Suide se jeug

Die derde groenwaterstofverwante beursgeleentheid is Woensdag op Gibeon van stapel gestuur.Inwoners van Gibeon, die res van die Hardapstreek en ook van die ||Kharasstreek het gretig gewag dat die visepresident, Lucia Witbooi, hulle by die Primêre Skool Hendrik Witbooi toespreek.“Vandag se geleentheid is ’n beduidende stap vorentoe om te verseker dat geleenthede vir die groenwaterstofekonomie alle uithoeke van ons nasie bereik, veral diegene wat histories agtergelaat is,” het Witbooi gesê.Duitsland se ministerie van navorsing, tegnologie en die ruimte het aanvanklik vyf miljoen euro aan die Namibiese Jeug vir Groen Waterstof-beursprogram, voorsien en meer as 180 jongmense het sedert die eerste en tweede rondes in 2022 en 2023 daarby gebaat. Dit het egter duidelik geword dat min jongmense van die Hardap- en ||Kharasstreek voordeel uit dié program trek.Witbooi sê sy is trots daarop dat N$25 miljoen verkry is om verdere studiegeleenthede aan studente spesifiek van hierdie twee streke te bied, waar die meerderheid van Namibië se groenwaterstofontwikkeling beplan word.Om optimale verteenwoordiging van die jeug van Hardap en ||Kharas in groenwaterstofopleiding te verseker, sal die derde uitrolprogram uitsluitlik op dié twee Suidestreke fokus.Frank Mungunda, ’n inwoner van Mariental, is die enigste persoon van die Suide wat ’n Jeug vir Groen Waterstof-beurs in 2021 ontvang het. Hy was ook teenwoordig by die geleentheid.Witbooi voer aan Namibië “moet in mense belê” as hy ’n globale spilpunt vir skoonenergie-opwekking, ’n leier in groen uitvoere en ’n baken vir volhoubare nywerheidsontwikkeling in Afrika wil word.Vir hierdie doel word klem gelê op die bevordering van tegniese vaardighede, sê die visepresident.“Die groenwaterstofekonomie sal nie net wetenskaplikes en ingenieurs benodig nie, maar dit sal tegnici, sweisers, elektrisiëns, loodgieters en veiligheidsinspekteurs vereis,” sê sy.Haar boodskap aan jongmense van die suide van Namibië was duidelik: “Julle is nie vergete nie. Hierdie beurse is vir julle. Julle drome, julle talent en julle bydrae is nie net nodig nie, maar noodsaaklik.”SERTIFIKAATKURSUSSEDie beurse is beskikbaar vir Namibiese jongmense tussen 18 en 35 jaar oud, uit die twee streke, om beroepsgerigte sertifikaatkursusse te volg. Beroepsgebiede wat gefinansier word, sluit in sweiswerk en ketelmaak, pas- en draaiwerk, sonkraginstallasie en -onderhoud, motormegatronika, elektriese ingenieurswese, asook loodgieters- en pyppassingwerk.Aansoeke sal van 7 Julie tot 18 Julie aanvaar word, volgens die visepresident, en spanne van die Namibiese groenwaterstofprogram sal tussen 7 Julie en 11 Julie deur die twee streke toer vir ’n bewusmakingsveldtog, het sy bygevoeg.Die Wetenskaplike Dienssentrum vir Klimaatsverandering en Aanpasbare Grondbestuur in Suider-Afrika (SASSCAL) en die Finansiële Hulpfonds vir Namibiese Studente (NSFAF) is ook by die veldtog betrokke, sê Witbooi.“Ons bring die geleentheid na julle, na julle dorpe, julle nedersettings, na julle mense.“As die beskermheer van hierdie beursprogram, sal ek die suksesverhale wat uit hierdie samewerking voortspruit, noukeurig dophou,” het Witbooi gesê.Die adjunkhoof van die sending by die Duitse ambassade in Namibië, Florian Seitz, het by die geleentheid gesê Namibië se vasberadenheid om die groenwaterstofgeleentheid aan te gryp, is inspirerend.“Duitsland is trots om deel van Namibië se groen toekoms te wees,” het hy gesê.– augetto@nmh-hub.com.na

Beurse vir die Suide se jeug

Kommentaar

Republikein 2025-07-04

Meld asseblief aan om kommentaar te lewer

Beurse vir die Suide se jeug

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie