VN plaas soeklig op Namibië se menseregte

Die Verenigde Nasies (VN) se kantoor van die hoë kommissaris vir menseregte het onlangs met Namibië se prokureur-generaal, Festus Mbandeka, vergader om die land se menseregteprestasies en -uitdagings te bespreek.Die voorsitter van die VN se Menseregtekomitee, Tania Abdo Rocholl, het gesê Namibië respekteer vryheid van uitdrukking, maar het kommer uitgespreek oor korrupsie in openbare verkryging en die toepassing van omgewingswetgewing.Mbandeka het Namibië se rekord oor persvryheid beklemtoon en gesê staatsmedia verteenwoordig alle politieke standpunte. Hy het ook gesê daar is geen politieke inmenging met staatsmedia nie.Die Teenkorrupsiekommissie (ACC) is gestig om deursigtigheid en aanspreeklikheid in openbare verkryging af te dwing, terwyl die regering poog om die wet op die beskerming van fluitjieblasers te implementeer en terwyl wetgewing in die parlement hersien word, het Mbandeka bygevoeg.Hy het gesê die wet op omgewingsbestuur is op ondernemings van toepassing en vereis dat ondernemings die omgewing moet beskerm of boetes in die gesig staar.Ander kwessies wat bespreek is, sluit in die oormatige gebruik van geweld deur wetstoepassers, poligamie, huishoudelike en geslagsgebaseerde geweld, aborsie, mensehandel, die uitbuiting van kinders, die behandeling van gevangenes, buitelanders, migrante en asielsoekers en die reg op privaatheid.Volgens Mbandeka beoog die regering om die kantoor van die ombudsman verder te bemagtig en ’n konsepwet in dié verband behoort vanjaar aan die parlement voorgelê te word.“Daar is geen wetgewing wat die oormatige gebruik van geweld magtig nie,” het hy beklemtoon. “Geweld word slegs toegelaat in omstandighede waar polisiebeamptes in gevaar is,” het Mbandeka gesê.Hy het gesê die ministerie in die presidensie verantwoordelik vir geslagsgelykheid, armoede-uitwissing en maatskaplike welsyn ontwikkel tans ’n nuwe plan om geslagsgebaseerde geweld te bekamp.Verder word die wet op sodomie in die hoërhof betwis en die konsepwet oor marteling word hersien, terwyl die ombudsman marteling moet bekamp asook kinderarbeid.In terme van die hersiening van die wet op aborsie en sterilisasie, is openbare konsultasies gehou en die proses is in sy finale stadium, het die prokureur-generaal gesê.Die VN-komitee wou weet hoekom byna 54% van gevangenes in Namibië verhoorafwagtend is, met talle wat al etlike jare in aanhouding is.Mbandeka het gesê vertragings in verhore word aan verskeie kwessies toegeskryf, insluitend hoë sakeladings in sekere howe, verhoorafwagtendes se aansoeke teen regsbeamptes en bykomende tyd om vir verhore voor te berei.Hy het gesê Namibië se korrektiewe dienste het ’n vyfjaarplan om aanhoudingsfasiliteite op te gradeer, en dat daar geen rekord bestaan van minderjariges wat saam met volwassenes aangehou is nie.Die staat erken die behoefte om huidige wette en beleide te verbeter en sal voortgaan om institusionele hervormings en beleide na te streef, het hy gesê.“Die reg op vrede is noodsaaklik vir menseregte. Geen menseregte kan geniet word in die afwesigheid van vrede en stabiliteit nie. Die staat poog om vrede en stabiliteit te verseker as ’n grondslag vir die versterking van sy mense se menseregte,” het Mbandeka gesê. – augetto@republikein.com.na

VN plaas soeklig op Namibië se menseregte

Kommentaar

Republikein 2026-02-03

Meld asseblief aan om kommentaar te lewer

VN plaas soeklig op Namibië se menseregte

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.