’n Stad wat aanhou asemhaal

Die oggendson hang oor die water by Dubai Creek. Families stap langs die promenade, kinders hardloop tussen die bankies en die stad se bekende stadsilhoeët blink in die verte. 

Vir iemand wat net na internasionale nuus kyk, kan dit ’n verrassende toneel wees, want op dieselfde tyd wys statistieke dat honderde aanvalle van missiele en hommeltuie op die Verenigde Arabiese Emirate (VAE) afgevuur is. 

Volgens amptelike data van die VAE, het die VAE se lugverdediging onlangs 253 ballistiese missiele opgespoor, waarvan 233 onderskep is, terwyl 1 440 hommeltuie opgespoor is en 1 359 is onderskep deur ’n verdedigingstelsel wat THAAD- en Patriot‑missielafweerplatforms insluit.

Sulke syfers is nie net militêre statistiek nie; hulle wys die skaal van die konflik ná groot militêre operasies van die Verenigde State van Amerika (VSA) en Israel teen Iran aan die einde van Februarie.

Vir baie mense wat hier woon, voel die werklikheid anders.

’n Inwoner van Dubai skryf kort ná die eerste aanvalle in ’n plasing op sosiale media: “165 missiele. 541 hommeltuie. En vanoggend stap mense saam met hul families by die Creek.”

Vir hom is dit nie naïwiteit nie.

“Dit is hoe dit lyk wanneer ’n nasie die vertroue van sy mense verdien het,” skryf hy.

Iran het volgens internasionale berigte al meer as 1 400 missiele en hommeltuie op die VAE en ander Golfstate afgevuur sedert die begin van die konflik. 

STERK VERDEDIGINGSTELSEL

Volgens amptelike verslae van die weermag van die VAE is sedert 28 Februarie meer as 1 300 van 1 422 hommeltuie onderskep en 221 van 238 ballistiese missiele vernietig voordat dit skade kon aanrig – ’n aansienlike prestasie vir die land se uitgebreide verdediging.

Hierdie verdedigingstelsels, wat ontwerp is om aanvalle op verskillende hoogtes te hanteer, het die meeste van die missiele afgeskiet, maar nie altyd sonder gevolge nie. Skrapnel en puin van onderskepte missiele in woongebiede het inderdaad skade veroorsaak en tot vier bevestigde sterfgevalle van burgerlikes gelei, asook duisende wat lig beseer is.

Die enigste direkte sterftes en beserings was nie deur direkte trefslae van missiele op infrastruktuur nie, maar deur puin en skrapnel wat op motors en woongebiede geval het. 

’n Motorbestuurder is byvoorbeeld in die Al Barsha‑gebied dood nadat puin van ’n onderskepte missiel van ’n lugverdedigingstelsel op sy voertuig geval het.

Alhoewel die meeste inwoners met hul daaglikse lewe voortgaan, verg die atmosfeer om hulle nogtans ’n mate van aanpassing en vasberadenheid.

LOGISTIEK

’n Namibiese vlieënier het ook gister aan Francoise Steynberg van Republikein bevestig dat 60% van ’n lugredery in die VAE weer sy vlugte hervat het.  

Hy bly naby ’n militêre basis, maar het gesê “ons hoor nie juis meer ontploffings nie”.

Volgens hom gaan alles weer normaal voort, “of so voel dit”. Hy is verheug dat hy weer agter die stange van ’n vliegtuig kan inskuif en nie net ’n simulator nie.

“Vlughervattings is besig om weer normaal te raak en die VAE is veilig om te reis,” sê ’n personeellid van ’n groot lugredery in die Golfstreek, wat om veiligheidsredes anoniem wil bly.

Sy verduidelik dat vlugte stadig herstel nadat die lugruimte aanvanklik tydens die konflik ten volle vir gesluit was en nou slegs vir kort tye vlugonderbrekings het weens aanvalle en onderskeppings.

TRAUMA

Maar hoewel die logistiek stadig na normaal terugkeer, beteken dit nie die ervaring is emosioneel maklik nie.

“Persoonlik is dit traumaties,” sê sy. “Maar dit is nie iets waar jy voel jy is in onmiddellike gevaar nie.”

Traumaties ja, maar deur die stad se gesofistikeerde verdedigingstelsels en waarskuwingsnetwerke – insluitend SMS‑boodskappe wat inwoners betyds inlig oor bedreigings – voel baie dat hulle steeds beskerm word.

“Die missiele word afgeskiet as verdediging en dit is dikwels die puin wat buite beheer op geboue val,” sê sy. 

“Die bedoeling is dat dit in die see moet val, maar dit is nie altyd moontlik nie.”

Tog beskryf sy die stad se ritme as opvallend normaal.

“Die paaie is besig en mense loop steeds in die strate,” sê sy.

Daar is wel plekke waar die spanning meer tasbaar voel. Volgens haar is die Dubai Marina-gebied byvoorbeeld rustiger as gewoonlik, moontlik omdat dit naby sekere militêre basisse geleë is.

Vir sommige families was die emosionele druk eenvoudig te groot.

“My familie en vriende het gister na Suid-Afrika teruggevlieg,” sê sy. 

“Met twee klein kinders was dit net te oorweldigend vir hulle.”

Tog beklemtoon sy dat inwoners volgens haar ervaring goed versorg word.

“Ons word baie goed versorg en die regering sorg goed vir sy burgers,” sê sy. “Die land self word nie aangeval nie; dit is hoofsaaklik Amerikaanse militêre basisse wat geteiken word.”

GEOPOLITIEKE IMPAK

Terwyl die wêreld na die Midde-Ooste kyk en wag vir verdere eskalasie, gaan die lewe in Dubai vir baie mense voort. Maar hierdie plaaslike verhaal is deel van ’n breër streekskets. Die oorlog en aanvalle het reeds wêreldwye ekonomiese gevolge, insluitend skerp styginge in oliepryse en drama op internasionale markte weens onsekerheid oor energievoorsiening deur die Straat van Hormoes – ’n noodsaaklike skeepsroete vir sowat 20 % van die wêreld se uitvoer van olie en vloeibare natuurlike gasse (LNG).

Ander Golfstate soos Katar, Saudi‑Arabië, Koeweit en Bahrein het soortgelyke ontploffings en onderskeppings in hul lugruimtes aangemeld, wat aandui hoe wyd hierdie konflik versprei het.

Vir baie mense wat Dubai hul tuiste gemaak het, gaan die verhaal egter oor meer as net verdedigingstelsels en geopolitiek.

Die inwoner wat sy gedagtes op sosiale media gedeel het, beskryf dit as iets dieper.

“Die media sien missiele en skryf paniek,” skryf hy. “Die mense wat hier is, voel iets anders – ’n stil, amper ongelooflike trots in die land wat hulle gekies het om hul tuiste te noem.”

Baie mense het nie net vir die stadsilhoeët of die son hierheen gekom nie, sê hy.

Hulle het gebly. Hulle het wortel geskiet.

“Wanneer iets soos hierdie gebeur,” skryf hy, “raak daardie wortels nie los nie. Hulle groei net dieper.”

En terwyl die wêreld na die Golfstreek kyk en wonder wat volgende gaan gebeur, stap families steeds langs die water by Dubai Creek in ’n stad wat, ten minste vir nou, steeds asemhaal. – Bykomende bronne: BBC, Al Jazeera, Reuters

– [email protected]