Miljoene ly honger midde voedselvermorsing, sê VN

Ellanie Smit - Meer as 780 miljoen mense ly honger ten spyte van die feit dat byna een derde van alle voedsel wat geproduseer word, tot niet gaan of vermors word.Dit volgens die sekretaris-generaal van die Verenigde Nasies (VN), António Guterres, wat gesê het meer as drie miljard mense kan nie gesonde diëte bekostig nie, terwyl twee miljard oorgewig of vetsugtig is en 462 miljoen ondergewig is.Hy het hierdie opmerkings gemaak by die VN se voedselstelselberaad en voorraadopname wat verlede maand by die hoofkantoor van die VN se voedsel-en-landbou-organisasie (FAO) in Rome plaasgevind het.Guterres het gesê dit is verregaande dat mense in ’n wêreld van oorvloed aanhou ly en van honger doodgaan.GEBROKE STELSEL Twee jaar gelede het die voedselstelselberaad gehelp om ’n kernwaarheid uit te lig, naamlik dat globale voedselstelsels gebreek is en miljarde mense die prys betaal, het hy gesê.“En sonder toegang tot finansiering en skuldverligting, sukkel ontwikkelende lande om te belê in voedselstelsels wat alle mense kan bereik met die voeding wat hulle nodig het om gesond te lewe.”Intussen voed onvolhoubare voedselproduksie, verpakking en verbruik die klimaatkrisis, genereer een derde van alle kweekhuisgasvrystellings, gebruik 70% van die wêreld se varswater en dryf verlies van biodiversiteit op ’n groot skaal, het Guterres bygevoeg. “Talle gemeenskappe is een skok weg daarvan om in voedselonsekerheid of selfs hongersnood te verval.”DAAR IS GENOEG “Daar is meer as genoeg geld om doeltreffende en volhoubare voedselstelsels te finansier om die wêreld te voed, terwyl hulle ordentlike werk ondersteun vir diegene om die kos wat ons eet, te kweek. En meer as genoeg landbou-innovasies en tegnologie wat gesonde kos binne elke persoon se bereik kan plaas,” het Guterres gesê. Hy het bygevoeg die goeie nuus is dat lande ag slaan op die waarskuwing wat hulle in 2021 uitgereik het toe hulle die eerste voedselstelselberaad byeengeroep het.“Meer as 100 lande het vorderingsverslae oor voedselstelseltransformasies ingedien.”Guterres het egter opgemerk dat dringende optrede nodig is om in volhoubare, billike, gesonde en veerkragtige voedselstelsels te belê.“Ons benodig ook groter beleggings in aanpassing en veerkragtige voedsel-, gesondheids-, water-, sanitasie- en landboustelsels wat skokke kan weerstaan, asook vroeë waarskuwingstelsels.”STEL MENSE EERSTEGuterres het ’n beroep op regerings en besighede gedoen om saam te werk om stelsels te bou wat mense bo wins prioritiseer. “Ons het voedselstelsels nodig wat kan help om die sinnelose oorlog op ons planeet tot ’n einde te bring. Die transformasie van voedselstelsels speel ’n kernrol in die vermindering van koolstofvrystellings en om aardverwarming tot 1,5 grade Celsius te beperk.”Transformasie beteken nuwe, volhoubare voedselstelsels wat die koolstofvoetspoor van voedselverwerking, verpakking en vervoer kan verminder, het hy bygevoeg.“Dit beteken om daarop aan te dring dat regerings en besighede meer doeltreffend en vinniger optree om die klimaatkrisis aan te pak. En dit beteken dat alle lande hulle daartoe moet verbind om netto-nul koolstofvrystellings te bereik – ontwikkelde lande teen 2040 en ontluikende ekonomieë teen 2050. Voedselstelsels en al die stelsels wat dit ondersteun – insluitend vervoer – moet bydra tot hierdie groot wêreldwye poging.” – republikein@republikein.com.na

Miljoene ly honger midde voedselvermorsing, sê VN

Kommentaar

Republikein 2026-02-03

Meld asseblief aan om kommentaar te lewer

Miljoene ly honger midde voedselvermorsing, sê VN

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.