Geingob woon Brics-beraad by

Die Namibiese president het gistermiddag na Suid-Afrika gevlieg om aan die Brics-Afrika-beraad en die Brics-plus-geleentheid wat tot vandag in Johannesburg voortduur, deel te neem. Staatshuis het gesê die Suid-Afrikaanse president Cyril Ramaphosa het ’n persoonlike uitnodiging aan president Hage Geingob uitgereik. Suid-Afrika speel vanjaar gasheer vir die 15de Brics-beraad. Die Brics-lande bestaan uit Brasilië, Rusland, Indië, China en Suid-Afrika. Al dié lande se presidente is by die beraad teenwoordig behalwe Rusland se president, Wladimir Poetin, wat deur sy minister van buitelandse sake, Sergei Lawrov, verteenwoordig word.Volgens Staatshuis sal Geingob ’n toespraak by die Brics-Afrika-geleentheid lewer asook by die Brics-plus-geleentheid. Albei toesprake sal fokus op kontinuïteit en om op soortgelyke geleenthede van die verlede te bou. Die tema van vanjaar se beraad is “Brics en Afrika: Vennootskappe vir versnelde groei, volhoubare ontwikkeling en inklusiewe multilaterale samewerking”.Nege Afrikaleiers is genooi om die beraad by te woon, insluitend Geingob in sy kapasiteit as die uittredende voorsitter van die Suider-Afrikaanse Ontwikkelingsgemeenskap (SADC)-troika.Geingob beplan ook om tydens sy besoek met China se president, Xi Jinping, te vergader, asook president Joko Widodo van Indonesië en eerste minister Pravind Kumar Jugnauth van Mauritius, volgens die president se kantoor. Die vergaderings sal na bewering fokus op die versterking van Namibië se ekonomiese diplomasie.Geingob sal ook vandag ’n toespraak gedurende die China-Afrika-leiersdialoog lewer, wat Ramaphosa en Jinping aanbied. Die tema van die dialoog is “Die bevordering van Afrika-integrasie en die gesamentlike opbou van ’n hoëvlak China-Afrika-gemeenskap vir ’n gesamentlike toekoms”. Leiers van China en Afrika sal saamwerk om vreedsaam, regverdig en deursigtig te werk te gaan om ontwikkeling en modernisering te bevorder.Geingob word môre weer in Namibië verwag, volgens Staatshuis. – augetto@republikein.com.na

Geingob woon Brics-beraad by

Kommentaar

Republikein 2026-05-05

Meld asseblief aan om kommentaar te lewer

Geingob woon Brics-beraad by

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.