Geingob, Chauke het oor 'veiligheidskwessie' vergader

Ogone Tlhage - Bejani Chauke, die man wat met president Hage Geingob vergader het tydens die hoogtepunt van die Phala Phala-soektog, sê hy die Namibiese staatshoofhet oor ’n ongespesifiseerde nasionale veiligheidskwessie ontmoet.

Chauke se weergawe is vir die eerste keer openbaar gemaak nadat ’n verslag oor die sage Vrydag deur Suid-Afrika se waarnemende openbare beskermer, Kholeka Gcaleka, vrygestel is. Die verslag het die Suid-Afrikaanse president, Cyril Ramaphosa, van enige oortredings vrygespreek.

Volgens sy weergawe van die gebeure sê Chauke hy is opdrag gegee om met Geingob te vergader oor ’n kwessie van nasionale veiligheid wat Namibië geraak het. Chauke het ’n private ontmoeting met Geingob en die Suid-Afrikaanse president se sekuriteitshoof, Wally Rhoode, gehad.

Die twee mans is met ’n Namibiese polisiehelikopter na Windhoek gevlieg wat op die spoor was van Namibiese verdagtes wat by Ramaphosa se private plaas ingebreek en na bewering N$13 miljoen in kontant gesteel het.

“Met betrekking tot die reis na Namibië, het mnr. Chauke gesê die president het op 24 Junie 2020 ’n brief gegee wat aan president Geingob gerig was. Hy is opdrag gegee om na Namibië as die president se afgevaardigde te reis om president Geingob te ontmoet. Chauke het gesê die doel van die vergadering met president Geingob was om ’n kwessie van nasionale veiligheid te bespreek waarin Namibië geraak word,” lui die verslag.

In die verslag word uitgelig dat Chauke nie in Namibië was om die Phala Phala-kwessie te bespreek nie.

“Mnr. Chauke het verder beklemtoon die enigste doel van sy besoek aan Namibië was om met president Geingob oor die bogenoemde kwessie te vergader. Volgens hom het dit geen betrekking gehad op enige kwessie wat verband hou met die diefstal by Phala Phala sowat vier en ’n half maande tevore nie,” lui die verslag.

Lede van Ramaphosa se sekuriteitspan het met lede van die Namibiese polisie (Nampol) vergader nadat ’n helikopter na die niemandsland-gebied op die grens tussen Namibië en Suid-Afrika tydens die piek van die Covid-19-pandemie gestuur is.

“Mnr. Chauke het ook aangedui weens dié buitengewone omstandighede was dit vir hom nodig om saam met die Suid-Afrikaanse polisiediens te reis om hom te help om die land te verlaat en weer die binne te kom. Hy het verder gesê die gebruik van die 'niemandsland'-gebied was weens die feit dat die land se grensposte in daardie stadium onbeman was weens die inperkings wat in plek was.”

Chauke het in sy verklaring gesê hy het nie geweet hoekom ’n besoek aan Namibië beplan is nie en hy het in opdrag van Rhoode opgetree.

“Mnr. Chauke het gesê hy het nie enige van die logistieke reëlings vir die besoek aan Namibië getref nie, dra geen persoonlike kennis hieroor nie en is deur Rhoode meegedeel dat hy hom gaan vergesel. Laasgenoemde het volgens hom onder die omstandighede gepas gelyk.”

Gcaleka het, volgens die Daily Maverick, die Suid-Afrikaanse president vrygespreek van oortreding in die klagte teen hom oor die hantering van die huisbraak en diefstal by die Phala Phala-plaas in Limpopo.

Sy het gesê baie van die bewerings wat teen Ramaphosa gemaak is, is ongegrond.

Hoewel die openbare beskermer Ramaphosa vrygespreek het, het sy tot die gevolgtrekking gekom dat Rhoode nie gemagtig was om 'n ondersoek na die inbraak op die plaas te doen nie en hy het dus baie vrae om te beantwoord

Die aankondiging is Vrydag tydens ’n mediasessie deur die kantoor van die openbare beskermer gemaak.

– [email protected]