Benut die krag van sport

President Netumbo Nandi-Ndaitwah (tweede van links) het Maandag in New York die bekendstelling van ’n strategiese vennootskap tussen die Netumbo Nandi-Ndaitwah-stigting (gestig deur Nangula Nelulu Uaandja – tweede van regs), die Queens of the Continent-stigting en die NBA-stigting bygewoon. 

Die vennootskap bevestig ’n gedeelde verbintenis om die krag van sport te benut ten einde geleenthede vir jongmense oraloor Namibië en Afrika te skep.

In ’n terugblik op haar eie reis as ’n voormalige netbal- en muurbalspeler, het die president gepraat oor die waardes wat sport buite die sportveld kweek – soos dissipline, spanwerk, selfvertroue en ’n gevoel van doelgerigtheid – en waarom sport steeds ’n belangrike deel van Namibië se ontwikkelingsagenda vorm. 

In ’n gesprek met Chiney Ogwumike, ’n voormalige WNBA-ster en basketbalontleder, het Nandi-Ndaitwah die belangrikheid daarvan beklemtoon om te verseker dat beide meisies en seuns geleenthede het om deel te neem, te groei en hulself as aktiewe bydraers tot die toekoms van hul gemeenskappe en die vasteland te sien.

Die vennootskap beoog om jeugontwikkeling deur middel van sport te bevorder, terwyl dit ook maniere skep vir groter deelname, leierskap en geleenthede oraloor Namibië en Afrika. – [email protected]