Windhoek-plaza: ‘Bou eers 30%’

Sonja Smith en Nikanor NangoloStad Windhoek (CoW) sê die agentskap vir nywerheidsontwikkeling in Namibië (Nida) moet minstens 30% van die konstruksiewerk voltooi voordat die verkoop van grond, wat vir die voorgestelde Pantum Namibia Plaza-ontwikkeling geoormerk is, oorweeg sal word.Die munisipaliteit het die voorneme goedgekeur om grond aan Nida te verhuur vir geriewe ter ondersteuning van die internasionale konferensiesentrum. Dit is deel van ’n groter ontwikkeling wat na bewering ’n stadion met 40 000 sitplekke, ’n luukse hotel en kommersiële eiendomme insluit.CoW se uitvoerende hoof, Moses Matyayi, het die goedkeuring skriftelik aan Republikein bevestig. Volgens hom is die huurooreenkoms nog nie gefinaliseer nie en sal Nida aan sekere voorwaardes moet voldoen, voordat dit vir besware en daaropvolgende ministeriële goedkeuring geadverteer word.“Sodra ministeriële goedkeuring verkry en die huurooreenkoms onderteken is, sal Nida konstruksiewerk tot ’n vlak van 30% moet voltooi voordat ’n verkoop oorweeg sal word,” het Matyayi gesê. In afwagting daarop dat Nida aan voorlopige voorwaardes voldoen, het die munisipaliteit ook nog nie ’n waarde aan die grond toegeken nie.Matyayi het bevestig ’n ontwikkelingsplan is ontvang, maar het gesê die verantwoordelikheid vir die uitvoerbaarheidstudie berus by Nida. ’n Omgewingsimpakstudie is ook deel van die voorwaardes. GESPREKKEDie reëlings met betrekking tot die grond kom te midde van Nida se onderhandelinge met Pantum Groups Ltd wat in die Verenigde Koninkryk (VK) gebaseer is vir die finansiering en eienaarskap van die projek.Volgens ’n vroeëre voorstel sou Nida 49% van die maatskappy besit wat die konferensiesentrum bedryf, terwyl Pantum en ander private beleggers 51% sou beheer.Nida se waarnemende uitvoerende hoof, Phillip Namundjebo, het vroeër bevestig ’n konsep-ontwikkelingsooreenkoms is opgestel. Dié dokument sit die verantwoordelikhede van die betrokke partye en die voorgestelde kommersiële reëlings uiteen. “Die status van enige ooreenkomste wat sedert Augustus formeel aangegaan is, bly onderworpe aan bevestiging teen Nida se interne goedkeuringsprosesse,” het hy gesê.AANDEELHOUDINGNamundjebo het gesê Nida se komitee vir nywerheidsontwikkeling en belegging het ’n gedetailleerde voorlegging van die belegger versoek, wat vervolgens gelewer is.“Pantum bly die privaatsektorvennoot wat in die projekdokumentasie, wat tans oorweeg word, geïdentifiseer is. “Die voorgestelde kommersiële struktuur maak voorsiening vir deelname deur die privaat sektor in die ontwikkelings- en bedryfsentiteite, terwyl Nida moontlik deel aan die eienaarskap van sekere bedryfsfasiliteite kan hê,” het hy Namundjebo gesê. “Die finale reëlings oor aandeelhouding, besonderhede oor voordelige eienaarskap en die onderskeie kapitaalbydraes bly onderworpe aan die nodige verifikasie en die finalisering van die toepaslike transaksiedokumente,” het hy gesê.Die agentskap moet nog sy voorgestelde kapitaalbydrae, die identiteite van al die beleggers en die finale eienaarskapstruktuur bevestig.ONTWIKKELINGSPLANNEPantum Groups Ltd, onder leiding van Festus Mansaray, het die ontwikkeling oorspronklik onder die naam Pantum Namibia Plaza voorgestel.Die aanvanklike planne het ’n konferensiesentrum vir 5 000 afgevaardigdes, ’n vyfsterhotel met 300 kamers, 100 gedienste luukse woonstelle en 36 luukse villa’s ingesluit, asook kantore, kleinhandelgeriewe, restaurante, ’n casino, ’n private ledeklub, ’n spa en gimnasiumgeriewe.’n Tweede fase het ’n sokkerstadion wat tussen 30 000 en 40 000 toeskouers kan huisves, oefenvelde, ’n Afrika-sokkermuseum, ’n sokkerskool en ’n elite-sokkerakademie in die vooruitsig gestel.Volgens die munisipaliteit se jongste projekbeskrywing verhoog die voorgestelde hotelkapasiteit na 510 kamers en sluit ’n winkelsentrum, landskapontwerpte openbare ruimtes, ’n park en ’n kunsmatige meer in.Die ontwikkeling word vir die Venus Township, suid van die westelike verbypad en wes van die Prosperita-nywerheidsgebied, beplan.Pantum het die Indiese konstruksie- en ingenieurskonglomeraat Shapoorji Pallonji as die voorgestelde kontrakteur vir ontwerp en konstruksie, Marriott as die hoteloperateur en Manchester City-sokkerklub as ’n voorgestelde sokkervennoot geïdentifiseer.Daar is egter geen bevestiging dat bindende ooreenkomste met hierdie organisasies aangegaan is nie. In ’n brief gedateer 13 November 2025 het Namundjebo Nida se bereidwilligheid oorgedra om deur middel van ’n gesamentlike onderneming met Pantum saam te werk. Die ontwikkelaar het voorgestel die grond vir die projek word deur middel van ’n kommersiële huurooreenkoms verkry, eerder as om dit gratis te ontvang.Namundjebo het gesê Pantum het ’n implementeringstydperk van 54 maande in die vooruitsig gestel, alhoewel die projek steeds in die voorbereidingsfase is. – sonja@nmh-hub.com.na; nikanor@nmh-hub.com.na

Windhoek-plaza: ‘Bou eers 30%’

Kommentaar

Republikein 2026-11-04

Meld asseblief aan om kommentaar te lewer

Windhoek-plaza: ‘Bou eers 30%’

Kommentaar

Republikein 2026-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.