Watertoevoer word verbeter

Die kabinet ondersteun die ministerie van landbou, water en grondhervorming se plan om ŉ nuwe ontsoutingsaanleg langs die kus te bou. Intussen is 23,3 km van die Kuiseb-Swakop-waterpyplyn vervang en met finansiering uit Duitsland sal die laaste 10 km ook voor Maart 2024 voltooi wees. Minister Calle Schlettwein het dié inligting onlangs in die parlement bekend gemaak. Hy het vrae beantwoord wat parlementslid mnr. Reggie Diergaardt oor landelike watertoevoer aan hom gerig het.Hy sê die direktoraat vir watertoevoer en sanitasiekoördinasie in sy ministerie, is besig om ŉ voorsorgplan vir die instandhouding van verouderde waterinfrastruktuur te ontwikkel. “Die sekerheid van watertoevoer in ŉ droë land soos Namibië bly ŉ uitdaging om aan die aanvraag wat amper daagliks groei, te voldoen,” sê hy. Schlettwein sê verskeie nasionale waterprojekte word toegepas en aksieplanne word hersien. “Die waarde van hierdie projekte, waarvoor finansiering reeds verseker is, en waarvan sommige reeds voltooi is terwyl ander ontwikkel word, is meer as N$10 miljard,” sê die minister. “Verskeie ingrypings is in talle dele van die land aan die gang om te verseker dat ons landelike gemeenskappe betroubare watertoevoer van aanvaarbare gehalte en voldoende hoeveelhede kry,” voeg die minister by.Die rehabilitasie van die Katima Mulilo-Kongola-waterskema Fase 1 en 2, het in April 2021 begin en sal teen Desember volgende jaar voltooi word. Dit behels honderde kilometer waterpypleiding en die opgradering van installasies vir wateronttrekking. Terselfdertyd word ’n grondwater- en oppervlakwater-waterskema suid van Ruacana gebou, saam met ŉ soortgelyke skema by Otjombinde, Fase 3 van ŉ soortgelyke projek tussen Katima Mulilo en Kongola, ook tussen King Kauluma en Omutsegwonime, asook tussen Katima Mulilo en Ngoma word Fase 3 en 4 gebou. Die Katima Mulilo-waterreservoir word uitgebrei, terwyl nog ŉ toevoerskema tussen Okeeholongo en Uutsathia in sy tweede fase is. Die ministerie bou ook 2 750 skole, gesondheidsentrums en openbare instansiegeriewe, terwyl huisgesinne in nood ook ondersteuning ontvang. Altesaam N$854 miljoen is vir dié ingrypings begroot en beskikbaar. Bykomend het die Afrika Ontwikkelingsbank ongeveer N$50,5 miljoen bewillig om gemeenskappe in te lig oor volhoubare waterverbruik, higiëne en waterbesparing.Verdere projekte met betrekking tot grootmaat-watervoorsiening sluit in die voltooiing van die Caluequedam se pompstelsel in Angola, waarvoor Namibië en Angola gesamentlik die kontrak aan ŉ Portugese maatskappy toegeken het en vir wie toegang deur Namibië na Suid-Angola vergemaklik word. Tussen Omahanene en Olushandja word die waterkanaal vanaf die Angolese grens opgegradeer, alhoewel NamWater kontrakteurs moet aanspoor aangesien die sperdatum van Augustus 2022 reeds verstryk het. Die pompstasie by Olushandja moet teen Desember vanjaar opgegradeer wees, terwyl die 70 km-waterkanaal van Olushandja na Ogongo herstel word, en die laaste deel daarvan teen Desember volgende jaar vervang sal wees. Die planne hiervoor is reeds opgetrek, volgens die inligting wat die minister verskaf het.NamWater ondersoek ook die opgradering en vergroting van die 54 km-waterkanaal vanaf Ogongo na Oshakati, terwyl ŉ vervanging van die 10 km deel naby Oshikuku ontwerp word. Die watersuiweringsaanleg op Oshakati word vergroot om teen Maart 2026 sy kapasiteit te verdubbel, terwyl die wateronttrekking en watersuiweringstelsel op Rundu teen dan heeltemal vervang moet word. Katima Mulilo se watersuiweringsaanleg sal ook vervang word.Verder word die Onhangwena-akwifer tussen Omafao en Eenhana ontwikkel, nuwe boorgate word by Berg Aukas geboor om die boorgatwaterskema te vergroot, en die plasing van boorgate om tussen Abenab en Tsumeb grootmaat-grondwater te onttrek en te stoor, is gedoen. Bekend as die Karst-ontwikkeling sal laasgenoemde egter tot Maart 2030 neem om te voltooi. Stad Windhoek moet ook ŉ ontwikkelaar aanstel om die grootte van die watersuiweringsaanleg by Goreangab teen Maart 2028 te verdubbel. – augetto@republikein.com.na

Watertoevoer word verbeter

Kommentaar

Republikein 2025-06-18

Meld asseblief aan om kommentaar te lewer

Watertoevoer word verbeter

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie