Twee Noordedorpe se inwoners kla oor kragonderbrekings

Nadat inwoners van Grootfontein en Tsumeb hul misnoeë uitgespreek het dat hul krag vir dae aaneen af is, het Cenored gesê hy is nie bewus van dae lange onderbrekings nie.

Inwoners is ook warm onder die kraag weens die skade wat deurlopende kragonderbrekings aan hul huishoudelike toestelle aanrig.

“Die krag gaan ontydig af. Soms oornag sonder enige waarskuwing,” sê ’n inwoner van Tsumeb.

“So breek ons toestelle en Cenored sê dit is nie hul verantwoordelikheid om vir ons skade te betaal nie.”

’n Inwoner van Grootfontein sê Tsumeb is nie die enigste Noordedorp wat kragonderbrekings ondervind nie.

“Grootfontein ondervind dieselfde probleem, en as huishoudelike toestelle breek weens kragonderbrekings, betaal die versekering nie meer uit nie,” sê dié inwoner.

“Grootfontein se krag is ook net so sleg en geld groei nie op ons rûe nie. As iets die gees gee is dit altyd net ons so jammer vir die ongerief. Wel, ek voel ook jammer ek betaal vir die krag. Maak dit reg,” het ’n ander inwoner gesê.

’n Sakevrou sê sy sukkel ook weens die voortdurende kragonderbrekings om haar kliënte gelukkig te hou.

“My toestelle werk nie nie altyd nie, so ek moet soms vir kliënte sê ek kan nie hul bestellings voltooi nie, dan verloor ek daardie besigheid,” sê sy.



CENORED REAGEER

Cenored se woordvoerder, Chali Matengu, het Donderdag bevestig daar was wel ’n kragonderbreking van sowat 24 uur.

Hy het egter gesê die onderbreking is veroorsaak deur beskadigde infrastruktuur wat aan NamPower behoort.

“NamPower voorsien krag aan ons, so ons is afhanklik van hulle, maar wanneer dinge soos hierdie gebeur, sê die publiek hulle het ’n kontrak met Cenored en nie NamPower nie,” het Matengu gesê.

“Kragonderbrekings is ’n algemene verskynsel in kragverskaffing weens verskeie faktore wat die verspreidingsnetwerke beïnvloed.

“Cenored belê voortdurend in die instandhouding en verbetering van die netwerk,” sê Matengu.

Hy verduidelik dat Cenored bewusmaking geskep het om inwoners in te lig oor voorsorgmaatreëls wat getref kan word as die krag skielik afgaan.

“Dit is nie wanneer die krag afgaan nie, maar wanneer dit weer aangaan dat toestelle beskadig word.

“Wanneer die krag herstel word, mag daar baie skielik baie krag deurvloei – soos wanneer jy jou hand voor ’n pyp met lopende water hou en jou hand dan wagvat – en dít beskadig toestelle.

“Ons raai inwoners aan om kragproppe af te skakel of toestelproppe te verwyder wanneer die krag aangaan om seker te maak dat hul toestelle nie beskadig word nie,” het hy gesê.

Volgens Matengu kan donderstorms ook bydra tot skade aan toestelle.

“Wanneer daar donderweer is, raai ons ook aan dat inwoners die kragtoevoer na hul toestelle afskakel, want erge donderweer kan ook kragstuwings (power surges) veroorsaak,” verduidelik hy.

Bewerings dat Cenored net een tegnikus gedurende die feestyd aan diens gehad het, is glo ook onwaar.

“Dis misleidend en sonder enige waarheid. Cenored het ’n bystandlys wat deur die jaar uitgerol word.

“Dit is teen bedryfspraktyke om ’n dorpsverspreidingsnetwerk sonder bystand aan ’n enkele persoon toe te wys.

“Volgens ons standaardpraktyke word spanne elektrisiëns en assistent-elektrisiëns altyd aangewys om noodsaaklike dienste te lewer tydens enige sluitings of na-ure,” sê Matengu.

Volgens Matengu gaan Cenored ook gebuk onder koperdiefstal.

“Wanneer kabels gesteel word, kan dit ons netwerk onderbreek en dit kos ons geweldig baie, want elke keer as daar koperkabels gesteel word, moet ons dit vervang.

“Dit het tot gevolg dat ons meer vir krag moet vra en mense kla reeds oor hoe hoog ons pryse is,” sê hy.

– [email protected]