Tsumeb kry wateraanleg

Ná voortgesette probleme met die gehalte van kraanwater op Tsumeb word ‘n splinternuwe en moderne watersuiweringsaanleg tans op die dorp gebou. Volgens Thomas Seifart van Aquarius Consult, die ingenieurs en hoofagent vir die aanleg, is die kontrak van N$36 miljoen op 5 Mei aan die gesamentlike onderneming Nexus-Nafasi toegeken. Seifart sê die projek behoort teen 30 Oktober voltooi te wees. Die projek behels ‘n nuwe watersuiweringsaanleg wat teen volle produksie tot 400m³ water per uur en gemiddeld sowat 300m³ water per uur sal suiwer. “Dit onttrek water wat tans onverwerk is uit die boorgate en verwyder cryptosporidium - mikrospore of mikrobiese organismes - uit die water. Dit maak die water minder &#039;hard&#039; deur die magnesium en kalsium te verminder," het hy verduidelik. Die mikrobiese organismes is vermoedelik die oorsaak van gesondheidskwessies as gevolg van Tsumeb se kraanwater. Die magnesium en kalsium verkort op hul beurt die lewensduur van die elemente van ketels en geisers, terwyl die &#039;harde&#039; water ook minder skuim van seep, opwasmiddels en waspoeiers veroorsaak. “Die water sal heeltemal veilig vir menslike gebruik wees. Ná die suiwering sal daar absoluut geen mikroörganismes meer in die water wees nie,” sê Seifart.Malcolm Deelie van Nafasi Water Namibia, die spesialiste in meganiese en elektriese stelsels vir die aanleg, sê dit is by verskeie watersuiweringsprojekte oraloor Namibië betrokke en bekend as operateur van die groot ontsoutingsaanleg op Swakopmund. “Ons brei uit om verskillende kontrakte oor Namibië te voltooi. Vir dié kontrak is ons die spesialis meganiese en elektriese kontrakteur en is &#039;n gesamentlike vennootskap met Nexus. Ons doen basies die ontwerp en is ook verantwoordelik vir onder meer die installering en finale oorhanding van die aanleg aan die kliënt,” sê Deelie. Seifart sê die grootte van die aanleg maak dit geskik om die hele dorp se waterstelsel te kan bedien. “Die water word behandel nog voor die Tupperdam-reservoir wat die finale, sentrale lokaal is en waarvan water deur die stelsel versprei word,” het hy verduidelik. Nexus is die siviele boukontrakteur wat vir die konstruksie van geboue by die aanleg verantwoordelik is. Wanneer die bouproses voltooi is, sal die meganiese en elektriese kontrakteur die betrokke toerusting installeer. Volgens Deelie word &#039;n reservoir van 2100m³ reservoir eerste opgerig om water te stoor. Dit word gevolg deur agt groot vate van twee meter elk in deursnee wat sand filtreer. Drie filters wat ione uitruil, is verantwoordelik vir die verwydering van die magnesium en die kalsium of die sogenaamde ‘harde’ stowwe, beter bekend as kalk. "Dié installasie word gevolg deur die installering van toerusting en masjinerie wat met waterstofperoksied mikrokieme doodmaak", sê Deelie. Laastens word ook chloor gebruik om die water verder te ontsmet.“Die kontrakwaarde is N$36 miljoen en kleingeld. Dit sal aangepas word soos ons aangaan en sluit ook enige gebeurlikhede in. Daar is 10% gebeurlikhede in die projekwaarde vir die onvoorsiene goed wat gebeur,” sê Seifart.Tsumeb se munisipale woordvoerder Stella Imalwa-Nangolo sê die munisipaliteit is dankbaar vir die “kritieke en noodsaaklike” wat teen einde Oktober voltooi sal wees. -augetto@nmh-hub.com.na

Tsumeb kry wateraanleg

Kommentaar

Republikein 2025-11-04

Meld asseblief aan om kommentaar te lewer

Tsumeb kry wateraanleg

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.