Rioolpype vervang

Okahandja se munisipaliteit het begin om rioolpype in die dorp se informele nedersetting Oshetu No. 2 te vervang. 

Die munisipaliteit se tegniese span voer die werk uit as deel van pogings om infrastruktuur vir sanitasie en dienslewering aan die gemeenskap te verbeter. 

Inwoners is gemaan om tydens die proses versigtig rondom werksareas te beweeg, ag te slaan op waarskuwingstekens en hul samewerking aan die tegniese span te gee terwyl die vervangingswerk aan die gang is. 

Volgens CityMender Namibia, ’n platform wat inwoners ’n gratis en maklike manier bied om kwessies rakende infrastruktuur en dienslewering aan te meld, te monitor en op te dateer, is daar tot dusver 53 probleme in Okahandja en Osona aangemeld. Hiervan hou 34 verband met paaie en slaggate, nege met afval en riool en tien met water en sanitasie. 

Kwessies wat deur die platform aangemeld word, sluit in onwettige storting van rommel, rioollekkasies, verstopte stormwaterdreine en straatligte wat nie werk nie.

CityMender Namibia poog om ’n werklike beeld van die toestand van infrastruktuur oraloor die land te verskaf. Dit stel gemeenskappe in staat om probleme aan te meld en diensleweringskwessies te monitor.

Inwoners word aangemoedig om die toep CityMender Namibia af te laai en kwessies rakende dienslewering en infrastruktuur in hul onderskeie gemeenskappe aan te meld.

Dit kan owerhede help om gebiede te identifiseer wat dringende aandag vereis.

– [email protected]