Plaaslike firmas moet 10% van spoorwegkontrakte kry

Hoofredaksie - Kontrakteurs wat aan Namibië se spoorwegopgradering ter waarde van miljarde dollars werk, moet minstens 10% van hul kontrakwaarde aan maatskappye of verskaffers toeken wat in Namibië geregistreer is.Die minister van werke en vervoer, Veikko Nekundi, het die vereiste vir plaaslike deelname in die Nasionale Vergadering bekend gemaak. Nekundi het verwys na die implementering van herstelwerk van spoorlyne wat die opgradering van die trajek tussen Kranzberg en Otjiwarongo insluit.Volgens die minister bepaal die tender- en kontrakdokumente vir die projek dat alle kontrakteurs verplig is om ’n minimum van 10% van die totale kontrakwaarde aan plaaslike maatskappye of verskaffers wat in Namibië geregistreer is, toe te ken. Hy het gesê die projek se toesighoudende span ingenieurs is ook opdrag gegee om bedrywighede so te struktureer dat betekenisvolle deelname deur plaaslike maatskappye verseker word en die kapasiteit van plaaslike klein- en mediumgrootte ondernemings (SME’s) en konsultante uitgebrei word.Verkrygingsrekords van die Afrika-ontwikkelingsbank (AfDB) toon dat ’n kontrak ter waarde van N$252,1 miljoen (uitgesluit belasting op toegevoegde waarde – BTW) aan Unik Construction Engineering Namibia toegeken is vir grondwerke aan die eerste trajek van 50 kilometer van die spoorlynopgradering tussen Kranzberg en Otjiwarongo.China Jiangxi International Economic and Technical Cooperation Co. Ltd het nog ’n kontrak vir grondwerke ter waarde van N$267,6 miljoen (BTW uitgesluit) ontvang, wat van kilometer 100 tot 150 strek.Indien die vereiste van 10% op die volle waarde van dié individuele konstruksiekontrakte van toepassing is, sou die minimum plaaslike toewysing ongeveer N$25,2 miljoen vir die Unik-kontrak en N$26,8 miljoen vir die China Jiangxi-kontrak beloop.Die regering het egter nie bekend gemaak hoeveel daar werklik ingevolge hierdie vereiste aan Namibiese subkontrakteurs en verskaffers betaal is nie.Nekundi het aan die parlement gesê verskeie plaaslike maatskappye neem aan konsultasie-, tegniese, omgewings-, verskaffings- en konstruksiewerk deel, wat met die spoorwegprojek verband hou.VAAGDie spoorwegprogram sluit ook ’n groot kontrak vir die verskaffing van spoorstawe in, wat aan China Civil Engineering Construction Corporation (CCECC) toegeken is.AfDB se verkrygingsrekords toon ’n kontrak ter waarde van N$868,2 miljoen is in Oktober 2024 aan CCECC toegeken vir die verskaffing van spoorstawe en wisselaars (turnouts) vir die Kranzberg-Otjiwarongo-trajek. Nekundi se parlementêre antwoord maak nie duidelik of die vereiste vir ’n plaaslike toewysing van 10% op die kontrak vir die verskaffing van spoorstawe op dieselfde wyse van toepassing is as by konstruksiekontrakte nie.Die opgradering tussen Kranzberg en Otjiwarongo vorm deel van die tweede fase van Namibië se projek vir die verbetering van vervoerinfrastruktuur, wat gesamentlik deur die regering en die AfDB gefinansier word.Die AfDB het in 2023 ’n lening van US$196,4 miljoen vir die program goedgekeur – wat 51,8% van die projekfinansiering verteenwoordig – terwyl die Namibiese regering die oorblywende 48,2% voorsien.Die program behels die bou van ongeveer 207 kilometer se nuwe spoorlyn langs die bestaande roete tussen Kranzberg en Otjiwarongo, asook 16 brûe en die opknapping van twee treinstasies. Dit sluit ook die verkryging van spoorstawe in vir ongeveer 518 kilometer se spoorlyn wat die Kranzberg-Otjiwarongo-Tsumeb-korridor en die Otavi-Grootfontein-aftakking dek.Volgens Nekundi vorder die implementering goed, met spoorstawe wat reeds afgelewer is en konstruksiewerk wat op gedeeltes van die korridor aan die gang is. Volgens die minister is 8 500 ton spoorstawe teen 22 Oktober 2025 afgelewer, met verdere besendings wat geskeduleer is namate die implementering vorder.Die spoorlyn word opgegradeer om aan die streekstandaard van Suider-Afrika vir ’n aslas van 18,5 ton te voldoen, aangesien Namibië poog om die vragkapasiteit te verbeter op die netwerk wat die hawe van Walvisbaai met die land se noordelike vervoerkorridors verbind. – republikein@republikein.com.na

Plaaslike firmas moet 10% van spoorwegkontrakte kry

Kommentaar

Republikein 2026-09-22

Meld asseblief aan om kommentaar te lewer

Plaaslike firmas moet 10% van spoorwegkontrakte kry

Kommentaar

Republikein 2026-09-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.