Otji se lughawevisie kry nie vlerke

Planne om Otjiwarongo se vliegveld te omskep in ’n lughawe wat kommersiële en vragvliegtuie kan hanteer, is al jare lank op die tafel.

In 2016 het die destydse goewerneur van Otjozondjupa, Otto Ipinge, die Otjiwarongo-munisipaliteit versoek om die Namibië Lughawemaatskappy (NAC) en die ministerie van werke en vervoer te betrek om ’n lughawe by die bestaande vliegveld te realiseer, met verwysing na die streek se mynbou- en nywerheidsbedrywighede.

Teen 2022 het die streek steeds berig dat planne aan die gang was om die vliegveld na ’n aanvaarbare standaard vir kommersiële en vragvliegtuie op te gradeer.

Vandag bly Otjiwarongo-lughawe (OTJ/FYOW) ’n klein vliegveld sonder geskeduleerde lugdienste. Die hoofaanloopbaan (met slaggate in die teer) is gelys as ongeveer 1 800 meter lank, terwyl nasionale vliegveldstandaarde voorheen ’n aanloopbaanvereiste van ongeveer 2 052 meter vir Otjiwarongo se klassifikasie aangedui het.

Tydens Republikein se besoek by die vliegveld Vrydag was dit ’n verlate terrein met net een vliegtuig onder ‘n seil en niemand, nie eens ’n sekuriteitswag, in sig nie.

Byna ’n dekade nadat die lughawevisie geopper is, bly die beloofde transformasie bloot ’n projek in wording, wat vrae laat ontstaan ​​oor hoe ver die projek eintlik van planne tot realiteit beweeg het.

– [email protected]