Onvoltooide huise by grenspos net so gelos

Miljoene dollars se voorafvervaardigde behuisingsmateriaal lê reeds vir byna drie jaar in wind en weer by ’n grenspos, nadat die kontrakteurs vir ’n behuisingsprojek vir personeel die projek net so gelos het. Die materiaal lê by die Mamuno-grenspos in die Omahekestreek en was bestem vir ’n projek om nege bykomende huise vir personeel as deel van die One Stop Border Post-inisiatief te bou. Die Namibiese Inkomste-agentskap (NamRA) se hoofbeampte vir doeane en aksyns, Festus Shidute, het aan die nasionale staande komitee oor binnelandse sake, sekuriteit, grondwetlike en wetlike aangeleenthede gesê vier kontrakteurs was tydens die latere fases by die projek betrokke. Shidute het gister tydens ’n besoek van die staande komitee aan die grenspos kommer uitgespreek oor die verlate behuisingsmateriaal en onvoltooide eenhede. Volgens hom het die laaste kontrakteur van die projek onttrek aangesien hy glo te min gekwoteer het. Hoewel 21 van die beplande 30 voorafvervaardige huise voltooi is, het die konstruksie van die res tot stilstand gekom, nadat die kontrakteur onttrek het. Shidute kon nie sê of die betrokke kontrakteur betaal is voordat hy aan die projek onttrek het nie en het aan die komitee erken die materiaal en gedeeltelik voltooide strukture is net so gelos. Die komitee se besoek was deel van ’n voortgesette oorsig van nasionale grensposte. Laasgenoemde volg op voorstelle wat in 2022 gemaak is aan ministeries om kwessies met infrastruktuur en bedryfsuitdagings by toegangspunte oraloor die land te takel. – republikein@republikein.com.na

Onvoltooide huise by grenspos net so gelos

Kommentaar

Republikein 2025-12-08

Meld asseblief aan om kommentaar te lewer

Onvoltooide huise by grenspos net so gelos

Kommentaar

Republikein 2025-12-08

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.