'Ons leer vir KI, nie andersom'

Verskeie Namibiese tegnologie-kenners is dit eens dat kunsmatige intelligensie (KI) wél die digitale gaping tussen Namibië en ontwikkelde lande kan oorburg, maar dat verskeie grondslagkwessies eers opgelos moet word. Nrupesh Soni, stigter en eienaar van Facilit8 Namibië, is van mening KI-oplossings sal eers vir Namibië aangepas moet word, terwyl dr. Arpit Jain, hoof van die Indië-Namibië Sentrum vir Uitnemendheid in Inligtingstegnologie (INCEIT), voel daar is ’n gaping in kommunikasie tussen akademici wat KI-stelsels moet ontwikkel en bedrywe waarvoor KI-oplossings ontwikkel moet word. "Ons moet weet wat die bedryf nodig het sodat ons vir hulle KI-stelsels kan ontwikkel om hul werk te vergemaklik," het hy tydens ’n paneelbespreking by CCHub in Windhoek gesê. Salt Essential IT se bemagtigingspesialis Vanessa Maresch, het tydens die bespreking gesê internetverbinding en die gehalte van Namibië se tegnologiese infrastruktuur sal drasties verbeter moet word om behoorlike integrasie met KI moontlik te maak. "Vir KI om te werk, moet jy die streke bereik. Jy het internetverbinding, infrastruktuur en opvoeding nodig. Ons sal moet opgradeer sodat ons infrastruktuur die werkslading kan hanteer," het sy gesê. Maresch het ook aangevoer KI-stelsels sal sy gebruikers weerspieël. "Ons lei die KI-stelsels op, nie andersom nie. As ons KI in ’n Terminator-situasie ontaard, sal dit wees omdat ons dit so opgelei het," sê Maresch. Sy het gemaan etiese oorwegings sal van kardinale belang vir KI wees. "As ek byvoorbeeld na ’n hardewarewinkel gaan om ’n hamer te koop, kan hulle my nie keer om die hamer te koop omdat ek moontlik iemand daarmee mag beseer nie. Dieselfde is waar vir KI - natuurlik gaan daar mense met slegte bedoelings wees wat dit gaan misbruik, maar terselftertyd gaan daar mense met goeie bedoelings wees wat gaan probeer om die slegte dinge weg te hou. Ons moet mense leer om KI op ’n etiese manier te gebruik en ons moet ’n etiese komponent in ons KI-stelsels inbou," sê Maresch. Soni sê inligting soos sensusdata moet vir die publiek beskikbaar wees sodat KI ook toegang het en dit kan gebruik. Volgens hom kan samewerking met ander lande en buitelandse entiteite Namibië kan help om aan die voorpunt van die KI-revolusie te kom. Hy het beklemtoon die samewerking moet voordelig vir alle betrokke partye wees. Maresch het op haar beurt gesê KI sal slegs in Namibië geïntigreer word, wanneer daar gebruike daarvoor is wat geld maak. Sy waarsku egter dat Namibiërs nie té afhanklik van KI moet word nie. "KI het nie gevoelens of kreatiwiteit nie. Die vraag is nou of ons onsself meer intelligent maak deur KI te gebruik en of ons die stelsel meer intelligent maak. KI moet al die vervelige, eentonige take oorneem en nie die kreatiewe werk nie. KI sal ons net vervang as ons hom leer om ons te vervang," het sy gesê. - irene-mari@nmh-hub.com.na

'Ons leer vir KI, nie andersom'

Kommentaar

Republikein 2026-02-03

Meld asseblief aan om kommentaar te lewer

'Ons leer vir KI, nie andersom'

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.