Nuwe huise vir 56 Oranjemund-gesinne

Altesaam 56 nuwe huise is verlede week aan begunstigdes in Oranjemund oorhandig onder die dorpsraad se N$6 miljoen-behuisingsprojek vir lae-inkomsteverdieners. Die een- en tweeslaapkamerhuise, gebou as deel van die dorpsraad se maatskaplike behuisingsveldtog, is amptelik oorhandig deur die adjunkminister van stedelike en landelike ontwikkeling, Evelyn !Nawases-Taeyele (regs). Shivanda Fridrik (middel), een van die nuwe huiseienaars, het nadat hy sy sleutels ontvang het, gesê: "Ek is verheug. Dit het so onverwags gebeur. Dit het as 'n verrassing gekom.". !Nawases-Taeyele het gesê die oorhandiging was deel van 'n breër nasionale agenda om behuisingslewering regoor Namibië te versnel. Die Oranjemund-dorpsraad het Uitbreiding 10 vir behuisingsontwikkeling geïdentifiseer nadat 'n opname aan die lig gebring het dat meer as 2 000 inwoners akkommodasie benodig. Van die 267 erwe wat geoormerk is, is 56 huise nou voltooi. Links is die waarnemende uitvoerende hoof van Oranjemund, Festus Nekayi. Foto Otis Daniels