Nuwe baadjie vir Karibib-Usakos-pad

Die rehabilitasie van die hoofpad tussen Karibib en Usakos wat oor 30 kilometer strek, het begin. Volgens die minister van werke en vervoer, John Mutorwa, bied die opknapping van die land se paaie en spoorweë ’n hupstoot vir Namibië se mededingendheid as die deurgangspunt vir in- en uitvoere, veral vir die lande in die Suider-Afrikaanse substreek wat deur ander lande omring is.

Danksy die finansiering van die Duitse federale ministerie vir ekonomiese samewerking en ontwikkeling word projek gefinansier en geïmplementeer deur die Duitse ontwikkelingsbank KfW. Die tender vir die projek is aan die Chinese konstruksiemaatskappy Zhong Mei Engineering Group toegeken, met vier plaaslike kontrakteurs – Ino Investment Holdings CC, Tangeni OM Trading CC, West Trading CC en Alugodhi Trading CC – wat as subkontrakteurs betrokke is. Die gekombineerde waarde van die werke wat vir die Namibiese kontrakteurs uitgesonder is, is sowat 25% van die totale waarde van die kontrak. Sowat 500 werksgeleenthede word tydens die konstruksieproses vir Namibiërs geskep. Die padkonstruksie sal binne 18 maande voltooi word.

Tot op hede was die KfW, in samewerking met die Paaieowerheid (RA), die mede-finansierder vir die konstruksie van meer as 1 700 km paaie in die land. Sedert 1990 beloop die fondse van Duitsland se bystand vir ontwikkeling in Namibië sowat N$32,3 miljard.

- [email protected]