Meer as 52 000 huise sonder krag

Meer as 52 000 huise in Windhoek bly sonder elektrisiteit, selfs terwyl die stad pogings verskerp om universele toegang te bewerkstellig.Vrydag het burgemeester Ndeshihafela Larandja opdrag vir elektrisiteitstoevoer aan vier blokke - erwe 2347, 2340, 2339 en 3222 - in Okatunda in die Tobias Hainyeko-kiesafdeling gegee. “Stel jou die impak voor,” het Larandja gesê en die lewensveranderende aard van toegang tot krag beklemtoon. Sy het die verhoogde samewerking met die Khomasstreekraad en die sentrale regering geprys vir die vordering wat reeds gemaak is.Die adjunk-premier en minister van nywerheidsontwikkeling, mynbou en energie, Natangue Ithete, het haar sentimente beaam en gesê die opdrag is ‘n goeie voorbeeld van spanwerk. Sedert verlede jaar is 814 huishoudings in Windhoek se informele nedersettings aan die kragnetwerk gekoppel, met 662 van hulle reeds aangeskakel. In Okatunda alleen is 68 uit 96 huise geëlektrifiseer.Informele nedersettingsVolgens O’Brien Hekandjo, hoof van Stad Windhoek se elektrisiteitsdepartement, is elektrifisering ’n belangrike stap in die rigting van die formalisering van informele nedersettings. “Dit sal die formalisering van informele nedersettings ’n hupstoot gee,” het hy gesê.Met verwysing na die 2023-bevolkings- en behuisingsensus het Hekandjo gesê Windhoek het na raming 144 000 huise, waarvan slegs 64% aan die elektrisiteitsnetwerk gekoppel is – insluitend verbindings in informele gebiede. Dit laat meer as 52 000 huise in die hoofstad steeds sonder toegang tot elektrisiteit.Met 'n jaarlikse behuisingsgroeikoers van 4% kan die getal met nog 2 000 huise per jaar toeneem.Volgens Hekandjo kan inkomste uit elektrisiteitsverhuring tot N$70 miljoen jaarliks genereer, wat weer herbelê kan word in broodnodige dienste soos infrastruktuur vir riool, water en paaie. OpgraderingTot dusver is sowat 4 000 huise aan die stad se kragnetwerk gekoppel in die kiesafdelings Moses Garoëb, Khomasdal, Tobias Hainyeko en Samora Machel.Die hoofstad verbeter ook openbare beligting, met vyf bykomende hoë masligte wat tans geïnstalleer word en wat die totaal op 18 te staan bring. Nog tien word teen die einde van die jaar beplan.Om in die groeiende aanvraag te voorsien, is N$235 miljoen in finansiering verseker vir 'n tweede kragstasie, buiten die bestaande een by Van Eck. 'n Verdere N$4 miljoen sal die ontwikkeling van 'n nuwe munisipale sonkragsentrum finansier.Die sentrum is daarop gemik om inwoners aan te moedig om in die voetspore te volg van die 930 huiseienaars wat reeds 'n gekombineerde 42 megawatt sonkrag van dakstelsels opwek.Bykomende opgraderings van infrastruktuur sluit in voltooide herbelyningsprojekte by Clanwilliam en Lafrenz, 'n nuwe verspreidingsentrum en grootmaatkragvoorsiening aan die weermaghoofkwartier en sentrale hospitaal.UitdagingsVordering word gemaak ten spyte daarvan dat die munisipaliteit se elektrisiteitsdepartement teen net meer as 60% van sy personeelkapasiteit werk. Slegs 140 uit 230 goedgekeurde poste is gevul.Om lewering te bespoedig, het Hekandjo 'n spesiale operasie met tydelike personeel versoek om die agterstand te takel. Hy het die ideale kandidate as "operasionele voetsoldate op die grond" beskryf.Planne sluit ook in die herlewing van die middestad deur openbare beligting te herstel, verouderde kragmeters te vervang en grootskaalse sonkragstelsels met 'n gekombineerde kapasiteit van tot 186 gigawatt-uur te bou.In 'n poging om kliëntediens te verbeter, sal die munisipaliteit bestuursdiente vir kragonderbrekings uitkontrakteer. 'n Nuwe SMS-kennisgewingstelsel sal inwoners inlig oor die oorsaak van kragonderbrekings en beraamde hersteltye verskaf.VergelykingHekandjo het klagtes oor die koste van elektrisiteit in die hoofstad deur Jan Publiek verwerp. Volgens hom is Windhoek se N$2,44 per eenheid laer as baie ander dorpe in die land. Erongo RED vra N$2,73 per eenheid, Cenored N$2,53, Oshakati Premier Electric N$2,63, en Kaapstad soveel as N$3,90 per eenheid het hy gesê.In reaksie hierop het Stad Windhoek se uitvoerende hoof Moses Matyayi hom ook uitgelaat oor die publiek se wanopvattings oor kragpryse. “Julle sê ons vra baie, maar in vergelyking met wie? Selfs met die skaalvoordele doen ons steeds beter.” - republikein@republikein.com.na

Meer as 52 000 huise sonder krag

Kommentaar

Republikein 2025-09-10

Meld asseblief aan om kommentaar te lewer

Meer as 52 000 huise sonder krag

Kommentaar

Republikein 2025-09-10

Meld asseblief aan om kommentaar te lewer

MELD AAN

Advertensie