N$80 m. glo op afgekeurde Namport-tender bestee

Die afgekeurde buitelandse belegger agter Lüderitz se voorgestelde olie- en gasvoorsieningsbasis van N$4 miljard het beweer dat sy maatskappye sowat N$80 miljoen bestee het om die projek te ontwikkel voordat die Namibiese Haweowerheid (Namport) dit gestop het. 

Die Ghanese sakeman, Jory Adu-Boahene, wie se Alpha Offshore Solutions aandele van 49% in Alpha Nautical Offshore Logistics (ANOL) besit, het gesê die buitelandse vennote het die projek sedert die begin daarvan uitsluitlik gefinansier. 

“Alpha Offshore Solutions en Alpha Nautical Services Limited was sedert die aanvang die enigste finansierders van ANOL en die projek. Tot op hede is ongeveer US$5 miljoen aangegaan in verband met die ontwikkeling en bevordering van die projek,” het Adu-Boahene aan Republikein gesê. 

Hy het gesê die geld is aan tegniese beplanning, logistiek en personeel bestee. 

“Hierdie koste sluit ontwerp- en ingenieursuitgawes, finansiële konsultasie- en advies-, regs- en professionele fooie, logistieke uitgawes, asook mannekrag- en personeelkoste in wat oor die afgelope vier jaar aangegaan is,” het Adu-Boahene gesê. 

Volgens hom het gesprekke oor die projek in 2022 begin, met ANOL wat die agentskap vir nywerheidsontwikkeling in Namibië (Nida) gereeld op hoogte gehou het van sy ontwikkelingswerk en kapitaalverpligtinge. Namport het ANOL se voorstel afgekeur nadat dit tot die gevolgtrekking gekom het dat die konsortium nie die finansiële vermoë, tegniese kundigheid, leweringsvermoë en bedryfservaring aangetoon het nie. 

Die haweowerheid het die projek weer vir mededinging oopgestel en op 12 Augustus nuwe uitdrukkings van belangstelling uitgenooi, met ’n sluitingsdatum van 12 Oktober 2026. Namport soek ’n private ontwikkelaar om die voorsieningsbasis te ontwerp, te bou, te besit, te bedryf en uiteindelik onder ’n konsessie van tot 25 jaar oor te dra. Op 4 November 2025 het die kabinet Namport en Nida goedgekeur om die projek gesamentlik te ontwikkel. Die beplande fasiliteit is bedoel om Lüderitz se kapasiteit uit te brei om logistiek, berging en ander ondersteuningsdienste aan Namibië se ontluikende buitelandse olie- en gasbedryf te lewer. 

AANDEELGESKIL VAN US$1  

Plaaslike sakeman Joseph Andreas se Tulaing Financial Services en Heritage Oasis Group Investment, wat met Jason Kasuto geassosieer word, het gesamentlik die Namibiese belang van 51% in ANOL verteenwoordig. Adu-Boahene het Andreas se aandeel van 25,5% in ANOL betwis. 

“Ons het daarna bewus geword van ’n beweerde transaksie waarvolgens Tulaing Financial Services na bewering ’n 25,5%-belang in ANOL vir US$1 verkry het,” het hy gesê. 

Volgens Adu-Boahene is die voorgestelde oordrag ingevolge ANOL se aandeelhouersooreenkoms verbied en was dit dus ongeldig. 

“Ons regsverteenwoordigers het korrespondensie aan mnr. Andreas en Tulaing gerig en hulle in kennis gestel dat die beweerde oordrag nie ingevolge die bepalings van die aandeelhouersooreenkoms toegelaat is nie en daarom as ongeldig beskou is en nie bindend op ANOL of sy bestaande aandeelhouers nie,” het hy gesê. 

Adu-Boahene het beweer dat ’n poging om die oordrag te registreer deur die Owerheid vir Sake- en Intellektuele Eiendom (Bipa) afgekeur is, nadat Kasuto beweer het dat sy handtekening op die dokumente bedrieglik verkry is. 

“Die poging om die beweerde oordrag in te dien is ook deur Bipa afgekeur ná voorleggings deur mnr. Kasuto, insluitend sy bewering dat sy handtekening wat op die betrokke dokumentasie verskyn, bedrieglik verkry is,” het hy gesê. 

Die Ghanees het gesê Andreas het geen geld direk tot ANOL of die Lüderitz-projek bygedra nie. 

“Mnr. Andreas het geen betaling of finansiële bydrae aan ANOL of aan die projek gemaak nie,” het hy gesê. 

Adu-Boahene het bygevoeg dat enige transaksie tussen Andreas en Kasuto sonder ANOL se “medewete, betrokkenheid of goedkeuring” aangegaan is. 

Andreas het verlede week aan Republikein gesê hy beskik oor ’n aandeelserifikaat wat deur Kasuto onderteken is –’n belang wat hy in Kasuto se Heritage-beleggingsmaatskappy verkry het, eerder as aandele direk van ANOL. “Ek het ’n aandeelserifikaat wat deur Jason Kasuto onderteken is. Ek het aandele in Kasuto se maatskappy genaamd Heritage Investment verkry. Heritage het op sy beurt 51% in ANOL Namibia,” het hy gesê. 

Beide Andreas en Kasuto het verlede week aan Republikein gesê hulle het van die projek weggestap en sal nie aan Namport se hernude tenderproses deelneem nie. 

“Ek stel nie meer in hierdie projek belang nie,” het Andreas gesê en voorstelle dat hy nuwe vennote bymekaar gemaak het as “spekulasie” afgemaak. 

Kasuto het ook geen belangstelling in die projek nie. “Ek het geen belangstelling in die projek nie en het daarom geen gesprekke oor die projek en sy besonderhede gehad nie. “Ek het geen belangstelling in die projek nie en het daarom geen gesprekke oor die projek en sy besonderhede gevoer nie. Nie ek of enige entiteit waarvan ek bewus is, gaan aan enigeversoek om voorstelle deelneem nie,” het hy gesê.

– [email protected]