N$119 m. vir padopgraderings by Rundu

Die Rundu-dorpsraad belê byna N$119 miljoen in projekte vir padinfrastruktuur.

Dit is daarop gemik om van die dorp se mees verwaarloosde woonbuurte te transformeer, toegang tot informele nedersettings te verbeter en ernstige stormwatererosie te takel wat paaie en kritieke infrastruktuur langs die Kavangorivier beskadig en eiendomme bedreig het. 

Die belegging bestaan uit N$101,65 miljoen vir die opgradering van paaie van 7,2 kilometer tot ’n lae-verkeer-bitumenstandaard in die woongebiede van Tutungeni en Queens Park woongebiede en N$17,34 miljoen om grondpaaie van 17 kilometer tot gruisstandaard in Kasote, Sauyemwa, Kehemu, Kaisosi en Ndama op te gradeer. 

Rundu se burgemeester, Andreas Jikerwa het gesê die projekte is ontwerp om mobiliteit regoor die dorp te verbeter, terwyl kritieke infrastruktuur teen die uitwerking van onbeheerde stormwateraflope beskerm word. 

Hy het gesê die bitumenpadprojek is hoofsaaklik van stapel gestuur om ernstige erosie te takel wat veroorsaak word deur stormwater wat teen hoë spoed vanaf hoër geleë gebiede na die rivier vloei. 

“As gevolg van die dorp se nabyheid aan die rivier, vloei stormwater teen hoë spoed van hoër geleë gebiede na laer geleë gebiede. Dit veroorsaak afwaartse erosie weens die sagte grond. 

“Groot slote het oor die jare gevorm as gevolg van onbeheerde stormwatervloei,” het Jikerwa gesê. 

Hy het verduidelik dat die opgegradeerde paaie stormwaterkanale sal insluit om afloop veilig deur beheerde uitlaatpunte te lei, wat erosie verminder en nabygeleë infrastruktuur beskerm. Volgens Jikerwa is Tutungeni en Queens Park geprioritiseer, omdat hulle die swaarste deur gronderosie getref is, met paaie, ondergrondse dienste en private eiendomme wat óf reeds beskadig is óf die risiko loop om verder vernietig te word. 

“Sommige eiendomme, paaie en ondergrondse dienste langs die rivieroewers is beskadig of loop die risiko van skade.” 

Hy bygevoeg dat ’n stormwater-meesterplan wat in 2024 deur ’n onafhanklike konsultant voltooi is, die twee woonbuurte as die raad se hoogste prioriteit vir stormwater-ingrypings geïdentifiseer het weens die bedreiging vir openbare infrastruktuur. 

Konstruksiewerk aan die projek het op 19 Maart vanjaar begin en sal na verwagting teen 27 April 2027 voltooi wees. 

“Die kontrakteur presteer baie goed en die projek is tans 1,4 maande voor skedule,” het Jikerwa gesê. 

Die tweede projek fokus daarop om toeganklikheid te verbeter deur sanderige tweespoorpaaie slegs vir vierwielvoertuie tot gruispaaie in Kasote, Sauyemwa, Kehemu, Kaisosi en Ndama op te gradeer as deel van die regering se dryfveer om infrastruktuur in informele nedersettings te verbeter. 

Jikerwa het gesê die paaie is gekies op grond van verkeersvolumes, terwyl insette van politieke leiers en ander belanghebbendes ook die prioritiseringproses beïnvloed het. 

Die projek is geskeduleer vir voltooiing op 1 Augustus, hoewel dit vertragings ervaar het wat veroorsaak is deur laat betalings van die regering, tekorte aan gruis ná die uitputting van die Kaisosi-gruisgroef en indringing op padreserwes. Ten spyte van dié uitdagings het Jikerwa gesê die opgraderings sal na verwagting padkonnektiwiteit regoor Rundu verbeter, reistye verkort en ekonomiese aktiwiteite aanwakker. 

“Die padprojekte sal konnektiwiteit regoor Rundu verbeter, wat dit makliker en veiliger maak vir inwoners, besighede en openbare vervoer om in die dorp rond te beweeg. Beter paaie sal reistye verminder, plaaslike ekonomiese groei ondersteun, toegang tot skole, klinieke en besighede verbeter en ’n meer doeltreffende lewering van munisipale en nooddienste moontlik maak,” het hy gesê. 

Die burgemeester het bygevoeg dat die raad beplan om voort te gaan met padkonstruksie in informele nedersettings en nuut ontwikkelde woongebiede, onderhewig aan beskikbare befondsing, beplanningsprioriteite en voortgesette ondersteuning van die regering. 

Hy het gesê die raad, saam met aangestelde konsultante, monitor kontrakteurs noukeurig om te verseker dat die projekte betyds, binne begroting en volgens die vereiste gehaltestandaarde voltooi word. 

“Om waarde vir belastingbetalers se geld te verseker, monitor die munisipaliteit, deur aangestelde konsultante, kontrakteurs se prestasie, projekgehalte, koste en tydlyne noukeurig om te verseker dat die werk doeltreffend en volgens die vereiste standaarde gelewer word,” het Jikerwa gesê.

– [email protected]