Ministerie stil oor lughawe-kwessie

Die ministerie van binnelandse sake, immigrasie, veiligheid en sekuriteit (MHAISS) het nie gereageer op navrae van Network Media Hub (NMH) oor of die ministerie sy hulpbronkapasiteit by lughawens gaan verhoog om visums vinniger te verwerk nie.Dit volg nadat die ministerie verlede week in ’n verklaring gereageer het op bewerings van lang wagtye by die Hosea Kutako Internasionale Lughawe en ’n afname in toerisme wat op sosiale media die ronde gedoen het.Besoekers aan Namibië het glo meer as vier uur gewag vir hul visums om verwerk te word en moes gevolglik alternatiewe verblyf in Windhoek vind omdat dit te donker sou wees om na hul lodge te ry.’n Plasing op sosiale media, wat op 23 Mei gemaak is, beweer ook dat ’n toergids sê dat hulle gewoonlik drie uur wag vir hul groepe om hul visums te laat verwerk.Die ministerie het in sy verklaring op 26 Mei twee voorbeelde van die vorige dag gebruik. Die ministerie het gesê ’n vlug van Frankfurt het Sondag met 243 passasiers aan boord geland. Die vlug het om 08:12 geland en om 09:27 is die laaste passasier se visum, volgens die ministerie afgehandel, wat beteken dat die beamptes by die lughawe elke persoon in gemiddeld 19 sekondes gehelp het. Nog ’n vlug, vanaf Addis Abeba, het 212 passasiers aan boord gehad en om 13:17 geland. Die laaste visum vir dië groep is na bewering om 14:40 verwerk. Dit beteken elke persoon is in gemiddeld 23 sekondes gehelp.Die ministerie sê ook Namibië het sedert die verandering in visumvereistes 70 000 buitelandse besoekers ontvang en N$100 miljoen in visumfooie gegenereer.Die ministerie het bewerings dat die nuwe visumvereistes ’n afname in toerismesyfers veroorsaak het, as vals afgemaak.“Die visum-by-aankoms is nie net in werking nie, dit bied tasbare en meetbare resultate. In teenstelling met die ongegronde bewerings in die berig, is daar geen bewyse van ’n afname in toerisme nie. “Namibië word steeds as ’n hoogs aantreklike en toeganklike bestemming vir internasionale reisigers beskou,” lui die ministerie se verklaring. Die plasing op sosiale media voer aan dat die afname in toerisme blyk uit die Gasvryheidsvereniging van Namibië (HAN) se akkommodasiebesettingsyfers vir die eerste kwartaal van 2025.Dié besettingsyfer is volgens HAN ongeveer 4% laer in die eerste kwartaal van 2025 vergeleke met dieselfde tydperk verlede jaar. In April vanjaar was die besettingsyfer ongeveer 3% laer as verlede jaar se besettingsyfer. GEMENGDE REAKSIERolspelers in die toerismebedryf het gemengde reaksies oor die kwessie gehad.“Niks wat ooit in enige deel van die wêreld begin is, het die eerste keer perfek gewerk nie. Ons moet agter ons owerhede staan om dinge vlot to laat verloop. “Laat ons positiewe voorstelle en bydraes maak eerder as om die heeltyd hierdie spottende, verkleinerende en neerhalende opmerkings te maak. Dinge sal met tyd verbeter,” het een gesê. Rolspelers se ervarings het ook verskil. “Gisteroggend het ek met ’n München-vlug aangekom, gevolg deur ’n Frankfurt-vlug en kort daarna ’n Airlink-vlug vanaf Johannesburg en Kaapstad – almal binne 30 minute,” het een gesê.Nog een het gesê: “Ek was vandag by die lughawe – die vlug [van Frankryk] was nie vol nie en mense het ure lank tougestaan.”“Die immigrasiepersoneel was proaktief en het in die rye geloop om mense na die regte rye te verwys. Hulle doen wat hulle kan gegewe die omstandighede. Kom ons ondersteun hulle en staan agter on mans en vroue in uniform,” lui nog ’n boodskap. “Vliegtuig het twee ure gelede geland, kliënt staan nog in die ry by doeane,” het ’n toergids in ’n WhatsApp-groep vir diegene in die toerismebedryf gesê.– irene-mari@nmh-hub.com.na

Ministerie stil oor lughawe-kwessie

Kommentaar

Republikein 2025-09-15

Meld asseblief aan om kommentaar te lewer

Ministerie stil oor lughawe-kwessie

Kommentaar

Republikein 2025-09-15

Meld asseblief aan om kommentaar te lewer

MELD AAN

Advertensie