Meer geld is nodig om Daures-pyplyn te voltooi

Die Erongo-streekraad benodig nog sowat N$1,2 miljoen om die Ozondati-Omatjete-waterpypleiding te voltooi nadat aanvanklike kosteberamings te kort geskiet het.Die totale projekkoste beloop nou meer as N$30 miljoen en die finale fase van hierdie nodige infrastruktuur is gevolglik vertraag.Omatjete ervaar reeds jare lank ’n ernstige watertekort weens droogtes. ’n Hidrosensus wat vier jaar gelede uitgevoer is, het waterreserwes in die Ozondati-gebied – wat sowat 31 kilometer van Omatjete geleë is – geïdentifiseer.Die streekraad het daarna ’n pypleidingprojek beplan om die krisis te takel en aanvanklik is sowat N$29 miljoen daarvoor begroot. Weens finansiële beperkings is die projek in twee fases verdeel en die eerste fase strek oor sowat 23 kilometer.Toe die projek egter na fase twee moes beweeg, het ’n bygewerkte oorsig van onkoste getoon dat die oorblywende agt kilometer meer geld sou vereis weens stygende materiaal- en arbeidskoste.“Die versoek om bykomende finansiering het voortgespruit uit inflasie en die nodige wysigings aan die oorspronklike hoeveelheidslys, insluitend die boor van ’n bykomende hoë-opbrengs-boorgat en die bou van olifantbestande mure by pompstasies om die infrastruktuur te beskerm,” het die hoofstreekbeampte, Mpenzeni Ntelamo, gesê en bygevoeg dat die kosteberamings hersien moes word.Die streekraad het daarna goedkeuring van die ministerie van finansies en staatsondernemings gevra om die projek se oorspronklike begrotingsperk te oorskry.Nog ’n sleutelfaktor wat tot die koste-aanpassing gelei het, was die behoefte om watervoorsiening verder as Omatjete uit te brei weens voortslepende droogtetoestande.“Die oorspronklike plan was om net water aan Omatjete te verskaf, maar met die droogte het dit nodig geword om te verseker dat ander dorpies langs die pyplyn ook kan baat,” het Ntelamo gesê.UITDAGINGSTen spyte van die finansieringsuitdagings, verseker die streekraad dat die projek op koers is.“Dis ’n sesmaandeprojek en ons verwag die praktiese voltooiing teen Mei 2025.“Die enigste potensiële risiko vir die tydlyn sal die voortdurende reën wees, maar konstruksie vorder goed, met vyf kilometer se slote wat reeds voltooi en pype wat gelê is.”Behalwe Omatjete, erken die Erongo-streekraad die groter behoefte aan waterinfrastruktuur in die streek. “Die Daures-kiesafdeling ervaar gereeld droogtes en ons is daartoe verbind om die infrastruktuur vir watervoorsiening nie net hier uit te brei nie, maar ook na gebiede soos Karibib en Walvisbaai se landelike kiesafdelings.“Die grootste uitdaging bly egter om voldoende finansiering te verseker,” het Ntelamo gesê.LANDELIKE GEBIEDENtelamo het ook verduidelik dat die 5%-aanslagkoersrekening (assessment rate account) korrek gebruik word.“Hierdie rekening, waar munisipaliteite geld namens die streekraad insamel ingevolge die wet op plaaslike owerhede, is ontwerp om landelike ontwikkeling te ondersteun. “Die raad het besluit om ’n gedeelte van dié geld aan hierdie waterprojek toe te wys om te verseker dat landelike gemeenskappe voordeel daaruit trek,” het hy gesê.Hy het verder verduidelik dat die ministerie van landbou, water en grondhervorming reeds N$11 miljoen tot die projek bygedra het, met die streekraad wat die oorblywende sowat N$1,2 miljoen uit die 5%-aanslagkoersrekening betaal het.“Ons is vol vertroue dat hierdie projek betyds voltooi sal word en toegang tot water vir talle gemeenskappe in nood sal verbeter,” het Ntelamo beklemtoon.– republikein@republikein.com.na

Meer geld is nodig om Daures-pyplyn te voltooi

Kommentaar

Republikein 2025-11-04

Meld asseblief aan om kommentaar te lewer

Meer geld is nodig om Daures-pyplyn te voltooi

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.