Meer as 18 000 soek grond in hoofstad

Stad Windhoek het bevestig dat Nova Actus Holding Company, ’n munisipale entiteit wat in 2021 bekend gestel is om die lewering van grond en behuising te versnel, ten volle geregistreer is, maar steeds nie in bedryf is nie. In reaksie op vrae van Network Media Hub (NMH), het die munisipaliteit gesê hoewel lewensvatbaarheidstudies voltooi is, besprekings vir finansiering steeds aan die gang is.Nova Actus, deel van ’n dapper poging om die hoofstad se voorsieningsraamwerk vir grond- en behuising te hervorm, is tydens Job Amupanda se ampstermyn as burgemeester tussen 2020 en 2021 van stapel gestuur.Die inisiatief was daarop gemik om ’n grootskaalse ontwikkelingsprogram te implementeer wat 7 000 erwe in informele nedersettings en 3 000 in formele gebiede teiken, terwyl vertragings wat deur burokratiese rompslomp en derdeparty-ontwikkelaars veroorsaak word, uitgeskakel word.Spesifieke gebiede vir die erwe sal eers geïdentifiseer word sodra bedrywighede begin, met toekennings wat gelei word deur kriteria wat deur die raad goedgekeur is. Volgens die stadvaders het hulle tans meer as 18 036 aansoekers op sy waglys vir grond.Die munisipaliteit het in reaksie op NMH se navraag nie bekend gemaak hoeveel grond beskikbaar is vir ontwikkeling nie, aangesien die syfers as gevolg van voortdurende beplannings-, opmetings- en diensprosesse wissel.Volgens die munisipaliteit sal raadsbesluite en die openbare verkrygingswet grondverkope aan private ontwikkelings lei.NOVA ACTUSToe Nova Actus in 2021 van stapel gestuur is, het Amupanda gesê dat dit as ’n maatskappy ten volle in besit van Stad Windhoek sou funksioneer en ontwerp is om burokratiese vertragings te systap.Hy het toe verduidelik ’n filiaal onder Nova Actus sou binne ses maande nadat dit in bedryf is, ’n finansieringsvoorstel indien. Amupanda het ook die hoofstad se finansiële posisie destyds voorgelê en verklaar dit het bates ter waarde van N$20 miljard, laste van altesaam N$2,7 miljard, en het toe ’n historiese skuldlas van N$700 miljoen gedra.Volgens Amupanda het die munisipaliteit ’n brief aan die kantoor van die president gerig en ’n uitruiling van skuld voorgestel. Volgens die “ruiltransaksie” sou die skuldlas afgeskryf word in ruil vir die lewering van grond namens die regering aan burgers. In 2021 het die hoofstad historiese skuld van N$700 miljoen gehad, met die raad wat gesê het hulle beplan om met die regering te onderhandel vir ’n skuldruiling of -afskrywing.“Ons boeke gaan gesond wees, terwyl ons nog in onderhandelinge met die regering is. Dit gaan vir ons makliker wees om finansiële instellings te betrek om ons bedrywighede te finansier,” het Amupanda verduidelik.Volgens hom sou Nova Actus Holdings na verwagting in die daaropvolgende weke ten volle geregistreer wees.Die aanvanklike loodsprojek vir bekostigbare behuising wat deur die raad gefinansier is, was geoormerk vir Goreangab Uitbreiding 4, met ’n breër uitrol wat beplan is vir ’n gebied van 24 hektaar in Cimbebasia.Toe is N$22 miljoen vir die loodsprojek opsy gesit. Drie jaar later bestaan Nova Actus egter steeds net op papier en bly die hoofstad se grondkrisis ’n kritieke brandpunt.INSPIRASIETalle hoofstede wêreldwyd het behuisingsmaatskappye in stadsbesit gevorm om bekostigbare behuising en stedelike ontwikkeling te takel. Wene in Oostenryk bedryf Wiener Wohnen, Europa se grootste munisipale behuisingsverskaffer, wat meer as 220 000 woonstelle bestuur.Hoewel dit ’n nasionale liggaam is, verskaf Singapoer se behuisings- en ontwikkelingsraad (HDB) behuising aan meer as 80% van inwoners en word dit dikwels as ’n suksesvolle openbare behuisingsmodel aangehaal.Helsinki se ATT wat in die stad se besit is, bou en ontwikkel huurbehuising, terwyl Berlyn firmas soos Gewobag en Degewo besit wat groot behuisingsvoorrade bestuur om huurpryse te help beheer.Stockholm se Stockholmshem fokus op volhoubare huurbehuising in staatsbesit. Amsterdam maak staat op gereguleerde behuisingsverenigings vir bekostigbare eenhede, en Paris Habitat, wat deur dié wêreldstad besit word, bestuur ongeveer 125 000 bekostigbare huise.Sulke modelle het dalk Nova Actus – veral Wene s’n – geïnspireer, maar anders as hulle is dit nog net ’n pypdroom. – republikein@republikein.com.na

Meer as 18 000 soek grond in hoofstad

Kommentaar

Republikein 2025-12-19

Meld asseblief aan om kommentaar te lewer

Meer as 18 000 soek grond in hoofstad

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.