Marientalers kry 34 nuwe huise

Die Nasionale Behuisingsonderneming (NHE) het verlede Donderdag op Aimablaagte in Mariental 34 huise aan nuwe eienaars oorhandig wat werksgeleenthede aan 150 plaaslike inwoners verskaf het. Die projek van nagenoeg N$6,6 miljoen is in Oktober deur kontrakteur Alnaa Capital Investments aangepak en is op 26 Junie vanjaar voltooi.By die geleentheid het Hasting Tjipueja, ondervoorsitter van die NHE-raad gesê, “die oorhandiging van 34 nuwe huise hier in Mariental is nie bloot 'n konstruksieprestasie nie, maar 'n strategiese belegging in maatskaplike stabiliteit, ekonomiese bemagtiging en gemeenskapstransformasie.” Volgens hom het die konstruksiewerk werksgeleenthede vir 150 inwoners van Mariental geskep. Tjipueja het die NHE se nuwe strategiese besigheidsplan, wat 'n paar weke gelede aangeneem was, uitgelig. Volgens hom het die onderneming sedertdien hernude entoesiasme en ywer om te verseker dat die teikens vervat in die vyfjaar-padkaart bereik word. “Die benadering om 'n poel kontrakteurs in alle streke aan te stel, toon reeds positiewe resultate, met elke kontrakteur wat tussen vyf tot vyftien huise toegeken word, wat die afleweringstydperk tot onder vyf maande verminder,” sê die ondervoorsitter. “Hierdie 34 huise is die resultaat van gesamentlike pogings,” het hy bygevoeg.By die geleentheid het die adjunkminister van stedelike en landelike ontwikkeling, Evelyn !Nawases-Taeyele uitgebrei oor ander suksesse wat NHE oor die afgelope maande behaal het. Sy noem die 64 huise wat in Ondangwa gelewer is, 30 huise in Omuthiya en 52 huise in Okakarara, wat sy sowat twee maande gelede amptelik oorhandig het. Sy sê die regering erken mense se regte tot voldoende lewenstandaard en behuising en het voorsiening van grond en toegang tot ordentlike behuising ‘n prioriteit van die hersiende nasionale behuisingsbeleid gemaak. “Ons weet almal van die verreikende uitdagings wat kom met tekorte van behuising, veral in ons informele nedersettings, wat gesondheid, onderwys en ekonomiese welvaart op familie- en nasionale vlak raak,” sê sy. Volgens !Nawases-Taeyele is grondlewering een van die mees kritieke rolspelers vir enige ontwikkeling in enige dorp. “Dit is onaanvaarbaar dat die grondleweringproses ingewikkeld en langdurig is, omdat dit elke ander gebied van ontwikkeling, insluitend behuising, raak.” Die adjunkminister sê president Netumbo Nandi-Ndaitwah se administrasie belê sedert Maart in gronddienste en die lewering van behuising, veral rakende oorvol informele nedersettings. Sy noem NHE se konstruksie van 160 huise gedurende die vestigingsfase van informele nedersettings se opgraderingsprogram in Windhoek, word tans na Swakopmund en Walvisbaai uitgebrei. Die behuisingsonderneming het ook intussen op 3 800 erwe in Rundu, Nkurenkuru, Katima Mulilo en in die kusdorpe begin bou, sê sy. !Nawases-Taeyele sê dit maak nie sin dat die regering se behuisingsonderneming (NHE) moet sukkel om grond by plaaslike owerhede nie kan bekostig nie, aangesien dit inwoners ontneem van die geleentheid tot ordentlike verblyf. “Ek herken die poging van die Mariental dorpsraad leierskap om grond vir hierdie wonderlike inisiatief beskikbaar te stel om lewering van behuising op die dorp te help bespoedig,” sê sy. Tjipueja sê egter dat die meerderheid plaaslike owerhede in opdrag van die ministerie saamwerk en dat betekenisvolle vordering met die opgraderingsprojek gemaak word. “Dit is my sterk oortuiging dat, met die nodige ondersteuning, NHE die teiken van 2 000 huise wat vir die onderneming vir hierdie boekjaar gestel is, sal lewer,” sê hy.– augetto@nmh-hub.com.nKlik op die skakel: q.my.na/4VDY

Marientalers kry 34 nuwe huise

Kommentaar

Republikein 2026-03-16

Meld asseblief aan om kommentaar te lewer

Marientalers kry 34 nuwe huise

Kommentaar

Republikein 2026-03-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.